Коронавирусым зиушъомбгъуным ищынагъо зэрэщыIэм епхыгъэу Iоф зышIэхэу, зыныбжь илъэс 65-м къехъугъэхэу 2020-рэ илъэсым мэлылъфэгъум и 6-м къыщегъэжьагъэу мэлылъфэ­гъум и 19-м нэс яунэхэм арысыщтхэм больничнэхэр аратынхэу Урысые Федерацием и Правительствэ унашъо ышIыгъагъ.

Мэлылъфэгъум и 16-м УФ-м и Правительствэ а унашъом зэхъокIыныгъэхэр фишIыгъэх ыкIи охътэ гъэнэфагъэкIэ ар къазэраратыщт  пIалъэр лъигъэ­кIотагъ. Зыныбжь илъэс 65-м къехъугъэу Iоф зышIэхэу, страховать зязыгъэшIыгъэхэм джы мэлылъфэгъум и 20-м щегъэ­жьагъэу и 30-м нэс больничнэхэр ыкIи пособиехэр аратыщтых.

Iоф зышIэрэ пенсионерхэм мыщ паекIэ ежь-ежьырэу

тхылъхэр агъэпсынхэу ищы­кIагъэп. IофшIапIэ языгъэгъотыхэрэм социальнэ страхованиемкIэ Фондым IэкIагъэхьэгъэ тхьапэхэмкIэ электроннэ шIыкIэм тетэу  больничнэхэр къаритыщтых.

Къэралыгъуабэхэм шIыкIэ амалэу агъэфедагъэхэм къы­зэрагъэлъагъорэмкIэ, цIыфхэр яунэхэм арысынхэмкIэ, уз щы­нагъоу коронавирусыр зэпамыхынымкIэ мыщ фэдэ шIыкIэ-­зекIуакIэм ишIогъэшхо къа­­кIоу ары. Сыда пIомэ, анахьэу уз щынагъор  къызэутэкIын зы­лъэкIыщтхэм зыныбжь хэкIотагъэхэр ащыщых.  Арышъ, ахэр яунэхэм къарымыкIхэу исхэмэ нахьышIу.

— Мы охътэ къинэу джыдэдэм тызэрытым къыхэкIыкIэ зыныбжь хэкIотагъэхэр яунэ­хэм къарымыкIхэу исынхэмкIэ тафэсакъын, тиIэпыIэгъу ядгъэкIын фае. IофшIэнымкIэ ыкIи социальнэ хэхъоныгъэмкIэ и Министерствэ унашъо зэришIыгъэмкIэ, илъэс 65-рэ зыныбжьхэу  лажьэхэрэм унэм исхэу Iоф ашIэн алъэкIыщт.

Ау ащ фэдэ амал ямыIэмэ, ахэм больничнэхэр аратыщтых, — къыIуагъ УФ-м Iоф­шIэнымкIэ ыкIи социальнэ хэ­хъоныгъэмкIэ иминистрэу Антон Котяковым.

Электроннэ шIыкIэм тетэу аратыщт больничнэр социальнэ страхованиемкIэ Фондым имылъку къыхахыщт. КъызызэIуахыгъэм щегъэжьагъэу мэ­фэпчъ мэфи 7-м къыриубытэу ар къалъытэщт ыкIи Iоф­шIакIом икартэ ар занкIэу фы­рагъэхьащт.

КъэIогъэн фае, илъэси 8-м ехъугъэу стаж зиIэм проценти 100-м кIахьэу ар къыфалъытэщт. Ащ пае аужырэ ­илъэситIум цIыфым илэжьапкIэ  аштэ, ау мыщ дэжьым  гурытымкIэ мазэм къыгъэхъагъэр сомэ 69961,65-м шIокIы хъущтэп. КIАРЭ Фатим.