Щынэгъончъэу къыIэкIэхьаным Iоф дашlэ
Адыгэ Республикэм и ЛIышъхьэу КъумпIыл Муратрэ «Россети Кубань» зыфиIорэм игенеральнэ пащэу Сергей Сергеевымрэ тишъолъыркIэ социальнэ инфраструктурэм энергиер зэрифэшъуашэу IэкIэгъэхьэгъэным епхыгъэ Iофыгъохэм атегущыIагъэх.
2020-рэ илъэсым мэлылъфэгъум и 16-м КъумпIыл Муратрэ Сергей Сергеевымрэ телефон зэдэгущыIэгъоу яIагъэм коронавирусым пэуцужьыгъэным фэшI социальнэ ыкIи инфраструктурнэ псэуалъэхэу республикэм итхэм энергиер зэрифэшъуашэу къаIэкIахьэмэ щытегущыIагъэх.
Сергей Сергеевым къызэрэхигъэщыгъэмкIэ, джырэ уахътэм медицинэ учреждениехэм ящыкIэгъэ энергиер аIэкIагъэхьаным гъэлъэшыгъэу лъэплъэх. Джащ фэдэу хэушъхьафыкIыгъэ госпитальхэм, Адыгеим ирайонхэм ыкIи икъалэхэм яинфраструктурэ, сотовэ зэпхыныгъэм иобъектхэм, интернет провайдерхэм, колл-гупчэхэм ыкIи логистикэ гупчэхэм анаIэ атырагъэты.
Медицинэ учреждениехэм электроэнергиер къаIэкIэхьаным фытегъэпсыхьэгъэ электропкъыгъоу агъэуцугъэхэм Iоф зэрашIэрэм чэщ-зымафэм зэпымыоу алъэплъэх. ЗыгорэкIэ ищыкIагъэ хъумэ агъэфедэн алъэкIынэу кВт 60-м къыщегъэжьагъэу 200-м нэс зилъэшыгъэ дизель-генератор 11 IэпэчIэгъанэу щыI.
Адыгэ республикэ клиническэ инфекционнэ сымэджэщым дэжь щагъэпсыгъэ госпиталым кВт 400 зилъэшыгъэ энергиер къэзытырэ псэолъэ тедзэхэр «Россети Кубань» зыфиIорэм щигъэуцугъэх. ИщыкIагъэ хъумэ, ахэр агъэфедэщтых ыкIи медицинэ учреждением къызэтемыуцоу Iоф ышIэным фэIорышIэщтых. ЫпэкIэ Адыгэ республикэ клиническэ сымэджэщыми кабельнэ линие IэпэчIэгъанэу щыращагъ. Ащ ишIуагъэкIэ медицинэ учреждением энергиеу IэкIахьэрэр къызэтеуцощтэп.
Компанием иIофшIэн зэрифэшъуашэу зэрэзэхищэрэр КъумпIыл Мурат игущыIэ къыщыхигъэщыгъ.
— ЦIыфхэм япсауныгъэ къэухъумэгъэнымкIэ медицинэм иIофышIэхэм амалышIухэр аIэкIэлъынхэм фэшI хэбзэ къулыкъухэмрэ организацие зэфэшъхьафхэмрэ акIуачIэ, амалэу яIэхэр рахьылIэнхэм мэхьанэшхо иI. Коронавирусым пэшIуекIохэрэм энергетикхэри ащыщых, — къыIуагъ КъумпIыл Мурат.
Шъолъырым энергиер щынэгъончъэу къыIэкIахьаным Iоф дэзышIэхэрэм IэпыIэгъу аригъэгъотыным зэрэфэхьазырыр республикэм ипащэ игущыIэ къыщыхигъэщыгъ.
Сергей Сергеевым къызэрэхигъэщыгъэмкIэ, республикэм щыпсэухэрэр унэм исынхэ фаеу зыщыхъугъэ уахътэм ахэм афэсакъых, гъэцэкIэжьынышхохэр зищыкIэгъэ IофшIэнхэр зэпагъэугъэх. Ащ нэмыкIэу, зэдэгущыIэгъум къыдыхэлъытагъэу, 2020 — 2021-рэ илъэсхэм ателъытэгъэ бжыхьэ-кIымэфэ лъэхъаным республикэм зызэрэфигъэхьазырыщтым иIофыгъуи тегущыIагъэх.
— Адыгеим джырэ уахътэ щыкIорэ Iофтхьабзэхэм апкъ къикIыкIэ энергетикхэм ашIынэу щытыгъэ гъэцэкIэжьынхэр зэблэхъугъэхэ хъугъэх, ау Iоф зыщашIэшъурэ чIыпIэхэм зэпамыгъэоу щэлажьэх. Санитарнэ-эпидемиологическэ щынэгъончъэным диштэу а IофшIэнхэр зэхащэх. ТиIофышIэхэм ащыщхэр Iудзыгъэ шIыкIэм тетэу мэлажьэх, — къыIуагъ Сергей Сергеевым.
Джащ фэдэу энергокомпанием иклиент офисхэм яIофшIэн Iудзыгъэ шIыкIэм тыригъэхьагъэх. Адыгеим исхэу мы фэIо-фашIэхэр зыгъэфедэхэрэр мыщ яолIэнхэ амал яI, ау онлайн режимымкIэ джэуапыр агъотыжьыщт. «Россети Кубань» зыфиIорэм иофициальнэ сайт унэе кабинетымкIэ лъэIур бгъэхьын плъэкIыщт. Джащ фэдэу «Портал-тп.рф», «СветлаяСтрана.рф» зыфиIохэрэм амалэу къатыхэрэр цIыфхэм къызфагъэфедэн алъэкIыщт.
Гъонэжьыкъо Сэтэнай.