Дунаир зэрэщытэу зэлъызыкIугъэ коронавирусым тикъэралыгъуи зы­зэрэщиушъомбгъурэм Урысыем и Президентэу Владимир Путиныр лъэшэу зэригъэгумэкIырэр къыдгурэIо, ащ пэшIуекIорэ Iофтхьабзэу зэшIуахыхэрэр игъодэдэхэу тэлъытэ.

Джащ фэдэу Адыгеим и ЛIышъхьэу КъумпIыл Мурат вирусэу цIыфхэр зыгъалIэхэрэм зимыушъомбгъуным фы­тегъэпсыхьэгъэ унашъоу ышIы­хэрэм адетэгъаштэ.

Коронавирусым тикъэралыгъо ишъолъырхэр зэкIэри зэ­лъиубытыгъэх, Адыгеири къыухьагъэп. Зы субъектым изакъоу ащ ущытекIон плъэкIынэу щытэп. Тиреспубликэ исхэм япсауныгъэ ыкIи ящыIэ­ныгъэ къэгъэнэжьыгъэным пащэхэр шIыкIэу щыIэ пстэумкIэ фэбанэх. Зэпахырэ узым икъэ­гъэуцун шIэныгъэ куу зиIэ специалист пэрытхэр къыха­гъэлажьэх. Вирусым зызэриу­шъомбгъурэм фэгъэхьыгъэ къэ­бархэр СМИ-хэм хэзыгъэ ямы­Iэу къытлъагъэIэсых.

Нахьыжъхэм я Совет хэтхэм республикэм имедицинэ щылажьэу — врачэу, фельдшерэу, медсестрау, IэпыIэгъу псынкIэм, аптекэхэм яIофышIэхэу коронавирусым пстэумэ апэ итэу ебэныхэрэм шъхьащэ афашIы. Ахэр япсауныгъэ емыблэжьхэу цIыфхэм IэпыIэгъу афэхъух, ви­русым зимыушъомбгъуным ыуж итых.

ЩыIэныгъэм зэхъокIыныгъабэ къыхэхьагъ. Тэ, нахьыжъхэм, тизакъоу псэухэрэм ар анахьэу зэхэтшIагъ, къин къытщэхъу. Арэу щытми, уз щынагъом узэ­рэпэшIуекIощт шIыкIэр специа­листхэм къагъэнэфагъ. Ар цIыф­хэр зэхэмыхьанхэр, шъхьадж иунэ исыныр ары. ЗэкIэми мыр дгъэцэкIэн фае! Анахь къиныр джыри тикъэралыгъо зэпичынэу ыпэ илъ. Арышъ, медицинэм иIофышIэхэм ар афэдгъэ­псынкIэным, цIыфхэм нахь ма­кIэу къин алъэгъуным апае щэ­Iагъэ къызхэдгъэфэн фае.

Нахьыжъхэм я Совет хэтхэм организацие зэфэшъхьафхэм, хъызмэтшIапIэхэм, политическэ партиехэм япащэхэм, зэкIэ Адыгэ Республикэм щыпсэухэ­рэм, анахьэу ныбжьыкIэхэм, зафагъазэ. Тызэхэмыхьаныр, шъхьадж иунэ исыныр зэпахырэ узым пэшIуекIорэ хэкIыпIэ закъоу зэрэщытыр къыдэшъу­лъытэнышъ, ар жъугъэцэкIэнэу, щэIагъэ къызхэжъугъэфэнэу, шъуиIофышIэхэм, шъуиIахьыл-­гупсэхэм, шъуигъунэгъухэм шъуа­фэсакъынэу, зищыкIагъэм IэпыIэгъу ешъутынэу тыкъы­шъуаджэ!

Къинэу тапэ къикIыгъэм тыпэшIуекIошъуным пае тызэгурыIон, тызэдеIэжьын фае.

ГЪУКIЭЛI Нурбый. АР-м инахьыжъхэм я Совет итхьамат.