Коронавирусым зызэриушъомбгъурэм къыхэкIыкIэ Адыгэ Республикэм ишъолъыр зекIоныр зыгъэмэкIэрэ Iофтхьабзэхэр зэрэщызэрахьэрэм ыкIи гъэлъэшыгъэ шIыкIэм ирежим зэрэтетхэм афэшI цIыфхэм IэпыIэгъу зэфэшъхьафхэр арагъэгъотых.

Къалэу Мыекъуапэ сабыибэ зэ­рысэу зигъот мэкIэ унэгъо 400-мэ гъомылэпхъэ зэфэшъхьафхэр зэрылъ Iалъмэкъхэр афащагъэх. А IэпыIэ­гъур зыпшъэ ифагъэр ООО-у «Майкопская ТЭЦ» зыфиIорэр ары.

Iалъмэкъым илъ гъомылапхъэ­хэр: тхьацу, гречк, пындж, тыгъэгъэзэ дагъ, былымыл консерв, щэ гъэIужъу­гъэ IэшIу, шъоущыгъу.

IэпыIэгъур зыгъэхьазырыгъэ предприятием икъулыкъушIэхэр, АР-м IофшIэнымкIэ ыкIи социальнэ хэхъо­ныгъэмкIэ и Министерствэ, цIыфхэм социальнэ фэIо-фашIэхэр афэзыгъэцэкIэрэ гупчэу Мыекъуапэ дэтым яволонтерхэр зэгъусэхэу агъэнэфэгъэ унагъохэм Iалъмэкъхэр къафырагощэкIыгъэх. Iэшъынэ Сусан.