ТицIыф лъапIэхэр!

Егъэзыгъэ Iоф хэмылъмэ ыкIи ищыкIэгъэ дэдэу щымытмэ шъуиунэмэ шъуакъырымыкIынэу тышъолъэIу. Амал зэриIэу цIыф куп зэхэтмэ шъуахэмыхь, шъузфэса­къыжь, джащыгъум зэпахырэ уз щынагъом зыщышъуухъумэн шъулъэкIыщт. ШIокI имыIэу хэушъхьафыкIыгъэ медицинэ пкъыгъохэмкIэ зышъуухъумэнхэ фае.

ШъунаIэ тешъодгъадзэ тшIоигъу, Адыгеим иполицие Iоф ешIэ ыкIи хъугъэ-шIагъэ горэм шъурихьылIагъэмэ зыфэжъугъэзэн шъулъэкIыщт. Ащ ителефон номерэу 02-мкIэ къэбарыр аIэкIэжъугъэхьан шъулъэкIыщт. Чэщ-зымафэм къыкIоцI полицием идежурнэ часть Iоф ешIэ.

Джащ фэдэу гъогухэм сакъыныгъэрэ Iэдэбныгъэрэ къащызхэжъугъэфэнэу тышъоджэ.

ЦIыфхэр агъэделэх

БэмышIэу Адыгеим щыпсэурэ нэбгырищмэ яахъщэ гъэпцIакIохэм зыIэкIагъэхьагъ.

Урысыем хэгъэгу кIоцI Iоф­хэмкIэ иотделэу Мыекъуапэ щыIэм идежурнэ часть илъэс 40 зыныбжь бзылъфыгъэм зыфигъэзагъ. Ащ къызэриIотагъэм­кIэ, ымышIэрэ горэ ителефон къытеуи, финанс учреждением иIофышIэу къыриIуагъ ыкIи иахъщэ зэрылъ счетым хэукъо­ныгъэ горэхэр хэхъухьагъэхэу гуригъэIуагъ. БзэджашIэхэм афэсакъынэу бзылъфыгъэм ыпэкIэ макъэ рагъэIугъэу щытыгъ нахь мышIэми, гъэпцIакIом къыриIуагъэр ышIошъ ыгъэ­хъугъ ыкIи икартэ тет кодым иномер бзэджашIэм риIуагъ. Ащ ыуж бэ темышIэу Мыекъуапэ щыпсэурэм исчет илъыгъэ ахъщэу сомэ мини 160-р гъэпцIакIом ритыгъукIыгъ.

Джащ фэдэу Мыекъуапэ щыпсэурэ илъэс 57-рэ зыныбжь бзылъфыгъэм иахъщэу сомэ мини 120-р гъэпцIакIом зыIэкIигъэхьагъ. Ащ ыпэкIи илъэс 30 зыныбжь бзылъфыгъэу Мыекъуа­пэ щыпсэурэм икартэ сомэ мини 150-рэ гъэпцIакIохэм рахыгъ. Бзылъфыгъэм ителефон хъулъфыгъэ горэ къытеуи, банкым иIофышIэу къыриIуагъ. Ар банкым икорпоративнэ номерэу 8-495-кIэ къыригъажьэ­рэмкIэ бзылъфыгъэм фыте­уагъ. Ащ икартэ гумэкIыгъо горэхэр къыпыкIыгъэхэу риIуи, кодэу тетхагъэм иномерхэр къызIэкIигъэхьагъ.

Джыри зы щыс. Илъэс 21-рэ зыныбжь кIалэм Интернет-сайтымкIэ имылъку ыщэзэ, гъэпцIакIом ыгъэдели, къыриIорэр ышIэзэ сомэ мин 18 икартэ рихыгъ. Мыекъуапэ щыпсэурэ хъулъфыгъэу илъэс 59-рэ зыныбжьым сакъыныгъэ къызхимыгъафэу сомэ мин 50 шIуатыгъугъ.

АР-м хэгъэгу кIоцI IофхэмкIэ и Министерствэ цIыфхэм за­къыфегъазэ сакъыныгъэ къызха­гъэфэнэу. ШъумышIэрэ цIыфым цыхьэ фэшъумышI. ГъэпцIагъэ зыхэлъ бзэджэшIагъэ къыжъу­ды­зэрахьагъэмэ полицием е шъузэ­пхыгъэ уполномоченнэ участковэм макъэ яжъугъэIу.

«ГъэпцIакIохэм шъуафэсакъ»

Ар зыцIэ Iофтхьабзэу Адыгеим иполицейскэхэм зэхащагъэм пэшIорыгъэшъ зэдэгущыIэгъу мини 4-м ехъу цIыфхэм адашIыгъ.

Iофтхьабзэу «ГъэпцIакIохэм шъуафэсакъ» зыфиIорэмкIэ зэхэщакIохэм мурадэу яIагъэр телефонымкIэ ыкIи ИнтернетымкIэ гъэпцIэн нэшанэ зиIэ бзэджэшIагъэхэу зэрахьэхэрэм цIыфхэр ащыухъумэгъэнхэр ары.

Уголовнэ лъыхъуным иоперативникхэм, полицием иуполномоченнэ участковэхэм ыкIи народнэ дружинэм хэтхэм дэкIыгъо Iофтхьабзэхэр зэра­хьэхэзэ организацие, предприятие ыкIи псэупIэ мини 3 фэдизмэ ащыIагъэх, узыгъэгъозэрэ зэдэгущыIэгъухэр цIыфхэм адашIыгъэх.

Анахьэу анаIэ зытырагъэтыгъэр зыныбжь хэкIотагъэхэр ары. Сыда пIомэ, нахьыбэрэмкIэ ахэр арых гъэпцIакIохэм агъэделэхэрэр. Хэбзэрэхьатныгъэр къэзыухъумэхэрэм зэхащэгъэ Iофтхьабзэм АР-м хэ­гъэгу кIоцI IофэхэмкIэ и Министерствэ дэжь щызэхащэгъэ Общественнэ советым дыригъэштагъ.

ГущыIэм пае, советым хэтхэу Светлана Дорошенкамрэ Александр Киреевымрэ Мыекъуапэ и ТОС-хэм ащыщ горэм язэIукIэ хэлэжьагъэх. ГъэпцIакIохэм анахьэу агъэфедэрэ шIыкIэхэр полицием икъулыкъушIэхэм къаIотагъэх – ахэр ушъхьагъу зэфэшъхьафхэмкIэ банкым икартэ илъ ахъщэр зэрэратыгъукIырэр ары.

Зэфэхьысыжьхэм къызэрагъэ­лъэгъуагъэмкIэ, полицием икъу­лыкъушIэхэр цIыфхэм занкIэу зэрадэгущыIагъэхэм зэфэхьысыжьышIухэр фэхъугъэх, узыгъэ­гъозэрэ тхьапэу афагощыгъэхэм яшIуагъэ къэкIонэу мэгугъэх.

БзэджэшIагъэ къыздызэрахьагъэхэм Адыгеим иполицие псынкIэу зыфа­гъэзэнэу макъэ арегъэIу

Шъуащыщ горэм хэбзэукъо­ныгъэ къыдызэрахьагъэмэ по­лицием ителефон номерэу 02-мкIэ шъутеон шъулъэ­кIыщт. ­

Бэ тешъумыгъашIэу полицием макъэ ежъугъэIумэ бзэджашIэр нахь псынкIэу къаубытын алъэ­кIыщт. ШъулъэкъуацIэ, шъуцIэ, шъуятацIэ ыкIи шъузыщыпсэурэ чIыпIэр яшъуIу. Хъугъэ-шIагъэр зыщыхъугъэ чIыпIэм шъуIумыкIыжьэу полицием икъулыкъу­шIэхэр къэкIофэхэ шъуяж.

ИгъэкIотыгъэу ыкIи шъыпкъа­гъэ хэлъэу зэкIэ къышъущышIыгъэр къулыкъушIэхэм яшъуIу. Нахьыбэ шъугу къэкIыжьэу афэшъуIуатэ къэсми, бзэджа­шIэр нахь къэубытыгъошIу афэ­хъущт. Зыщышъумыгъэгъупш, лажьэ зырахыгъэм полицием макъэ зыримыгъэIукIэ, бзэджа­шIэм пшъэдэкIыжь ымыхьэу хэтыщт.

Хэбзэукъоныгъэ зышIагъэм итеплъэ, ищыгъын, ицуакъэ зыфэдэм (жакIэ, пакIэ, анэл тетмэ, ыкIышъо сурэт хэутыгъэ тешIыхьагъэмэ) шъунаIэ те­шъудз.

БзэджэшIагъэр зылъэгъу­гъэм шъуелъэIуи, полициер къэкIофэ IушъумыгъэкIыжь. Яжэн ымы­лъэ­кIыщтмэ, ителефон номер, зы­щыпсэурэ чIыпIэр къежъу­гъаIу.

Тхыгъэ е жэрыIо шIыкIэм тетэу заявлениемкIэ дежурнэ частым зыфэжъугъэзэн шъулъэ­кIыщт. Ар къулыкъушIэхэм атхыщт ыкIи талон къышъуфыратхыкIыщт. Нэужым хъугъэ-шIа­гъэм епхыгъэу упчIэхэр къы­шъуатыщтых.

Ащ нэмыкIэу общественнэ рэхьатныгъэм икъэухъумэнкIэ къышъупэгъунэгъу полицием иучастковэ пункт зыфэжъугъэзэн шъулъэкIыщт.

Автотранспортым етыгъох

Анахьыбэу зэрахьэрэ бзэджэшIагъэхэм ащыщ автомобилым зэреты­гъохэрэр. Автотранспортым хэт апчхэр хаутызэ, пчъэр Iуатхъызэ тыгъон бзэджэшIа­гъэхэр зэрахьэх.

Автомобилыр зыехэми яла­жьэ хэлъэу къулыкъушIэхэм алъытэ: макъэ къэзыгъэIурэ пкъыгъор ямашинэхэм ахагъэуцорэп, яхьап-щыпхэр, мобильнэ телефонхэр, ахъщэр, документхэр къыранэх.

Мыщ фэдэ Iоф шъухэмыфэным фэшI АР-м хэгъэгу кIоцI IофхэмкIэ и Министерствэ автомобилыр зыехэм закъыфегъа­зэ, ямылъку фэсакъынхэу, къау­хъумэнэу.

Автомобилыр Iуа­мыфыным ыкIи ащ илъхэр рамытыгъу­кIынхэм фэшI шъушIэн фаехэр:

— автомобилым ипчъэ Iухыгъэу къэшъумыгъан ыкIи IункIыбзэр къыIушъумыгъан;

— цIыф макIэ зыщызекIорэ ыкIи нэфынэр зыдэщымыIэ чIыпIэхэм охътабэкIэ машинэр къаIушъумыгъан;

— чэщым шъуимашинэ гаражым чIэжъугъэуцу е ыпкIэ хэлъэу уцупIэм дэжъугъэ­уцу;

— осэ ин зиIэ хьап-щыпхэр ыкIи ахъщэр автомобилым къи­шъумыгъанэх.

НэкIубгъор зыгъэхьазырыгъэр КIарэ Фатим.