Коронавирусым пэшIуекIогъэнымкIэ Оперативнэ штабым изэхэсыгъоу щы­Iа­гъэр зэрищагъ Адыгэ Республикэм и ЛIышъхьэу КъумпIыл Мурат. Видео­конференцие шIыкIэм тетэу ар кIуагъэ.

Зэхэсыгъор къэбар гу­шIуагъокIэ рагъэжьагъ. Адыгеим и ЛIышъхьэ зэпахырэ узхэм зыщяIа­зэ­хэрэ сымэджэщым чIэлъ бзылъфыгъэу сабый къыз­фэхъугъэм фэгу­шIуагъ.

— ЧIыпIэ къин тит нахь мышIэми, щыIэныгъэр лъэкIуатэ. Сабый къызфэхъугъэ ны ныбжьыкIэм сыфэгушIо. Псауныгъэ пытэ иIэу ар къэрэхъу. Ным ипсау-ны­гъэ зэрэзэтеуцожьы­гъэм, кIэлэцIыкIуми узынчъагъэ зэриIэм мэхьанэшхо иI. Сицыхьэ телъ уахътэ зытешIэкIэ мыщ фэдэ къэбар гу­шIуагъохэм япчъагъэ джыри нахьыбэ зэрэ­хъущтым. Тызэгъусэхэу къиныгъохэм тапэшIуе­кIощт, коронавирусым тытекIощт, — къыIуагъ КъумпIыл Мурат.

Адыгеим псауныгъэр къэухъумэгъэнымкIэ иминистрэу Мэрэтыкъо Рус­тем къызэриIуагъэмкIэ, килограмми 3-рэ грамм 50-рэ къэзыщэчырэ сабыир узынчъагъэ иIэу къэ­хъугъ. Ными ипсауныгъэ изытет дэгъу, зэпахырэ узэу коронавирусыр иIэ­жьэп, хъужьыгъэ. Аужырэ уплъэкIун тестым изэфэ­хьысыжь ыуж сымэджэщым къычIатхыкIыжьынэу агъэнафэ.

Роспотребнадзорым АдыгеимкIэ и ГъэIорышIапIэ ипащэу Сергей Завгороднем къызэриIуагъэмкIэ, коронавирусыр къыз­пыхьагъэхэр зыIукIэгъэхэ цIыфхэр къыхэгъэщыгъэнхэм, мы узым пэшIуекIогъэным фытегъэпсыхьэгъэ IофшIэныр республикэм щылъагъэкIуатэ. Шъолъырым щыпсэухэрэм гъогогъу мини 10-м ехъурэ тестхэр акIугъэх, ахэм ащыщэу 1149-мэ аужырэ чэщ-зымафэм.

Медицинэм иучреж­дениехэм мыщ дэжьым анахьэу анаIэ атырагъэтын зэрэфаер респуб­ли­кэм ипащэ хигъэунэфыкIыгъ. Ащ къыпкъыры­кIызэ, сымэджэщхэр ыкIи поликлиникэхэр дезин­фек­цие шIыгъэнхэм, медикхэм тхьамафэ къэс тестхэр арагъэкIунхэм епхыгъэ IофшIэныр ыгъэлъэшынэу профильнэ ведомствэм пшъэрылъ къыфишIыгъ.