Непэрэ мафэм ехъулIэу коронавирусыр къызэутэкIыгъэ нэбгырэ пчъагъэр, ахэм япсауныгъэ изытет зыфэдэм зыщыдгъэгъозагъ. Инфекционнэ сымэ­джэ­щым иврач шъхьаIэу Сергей Долиннэм къызэриIуагъэмкIэ, IэзэпIэ уч­реж­дением госпиталь шъуашэм тетэу Iоф ешIэ. Коронавирус къызэузыгъэ е ащ фэдэ щынагъо зиIэ закъохэр ары мыщ чIэлъхэр.

Сымэджэщым непэрэ мафэм ехъулIэу нэбгырэ 70-м ехъу чIэлъ. Узыр къызыхагъэщыгъэу, уплъэ­кIунхэр зыфашIыхэу, зи­тхьабылхэр узхэу агъэу­нэфыгъэ пстэури мыщ къащэх. Тхьабылхэм Iоф язы­гъэшIэщт (ИВЛ) аппаратым нэбгыритIу пыгъэнагъ.

— Коронавирусыр къы­зэутэкIыгъэхэм япсауныгъэ изытет уигъэрэзэнэу щыт, ящыкIэгъэ медицинэ IэпыIэгъур ятэгъэгъоты, — къыIуагъ Сергей До­линнэм. — IэзэпIэ учреждением къычIэфагъэхэм тяIазэ, хъужьыгъэхэр чIэ­тэтхыкIыжьых. Къыхэгъэщыгъэн фае, тищыкIэгъэ медицинэ оборудованиехэр зэкIэ тIэкIэлъ. ЦIыф­хэм IэпыIэгъу тазэрафэ­хъущт Iэзэгъу уцхэри, тызэряIэзэщт Iэмэ-псымэхэри тиIэх.

Непэрэ мафэм ехъулIэу сы­мэджэщым Iоф щызышIэхэрэр сыхьати 4 — 5-рэ мэлажьэх. Ахэр ренэу яIофшIэгъухэм зэ­блахъух. Медикхэр сымэджэщым ия 3-рэ къат тет унэхэм арысы­щтыгъэх, ау ар IофышIэхэм къин дэдэ къащыхъущтыгъ. ЧIыпIэр зэ­блэмыхъоу, чэщ-зымафэм

мыщ ущыIэныр псынкIэп. Джы Iоф зышIэхэрэр зыгъэпсэфыпIэу «Бэрэчэт» зыфиIорэм ащэжьых ыкIи ащ зыщагъэпсэфы. Гъэ­тхапэм и 25-м къыщегъэжьа­гъэу ыпэкIэ зигугъу къэтшIыгъэ сы­мэджэщым Iоф щызышIэхэрэр яунэхэм кIожьыхэрэп, яIахьыл гупсэхэм ахэхьажьынхэ алъэ­кIырэп.

— Амалэу щыIэмкIэ общественнэ чIыпIэхэм шъуямыкIо­лIэнэу сыкъышъуаджэ, — цIыф­хэм закъыфегъазэ врач шъхьа­Iэм. — Анахьэу ар зыфэгъэ­хьыгъэр зыныбжь хэкIотагъэхэр ары. Вирусыр псынкIэу цIыфым епкIы, ар къызгурыжъугъэIон, амал иIэмэ унэм шъукъимыкIэу шъуисын фае. Узым жьыр зэрыкIохэрэм псынкIэу иягъэ арегъэкIы ыкIи тхьабылхэм зэрар арехы. Коронавирусым изакъоп, сыд фэдэ узи бгъэхъужьыныр нахь къины мэхъу къызэмы­гъэутэкIыным нахьи. Шъузфэсакъыжь, шъуипсауныгъэ имызакъоу, нэмыкI цIыфхэми япсау­ныгъэ изытет шъуIэ зэрилъыр зыщышъумыгъэгъупш!

Гъонэжьыкъо Сэтэнай.