КъумпIыл Мурат:
«Пандемием къыздихьыщт гумэкIыгъохэр зэкIэ къыдэтлъытэнхэр типшъэрылъ»
Эпидемиологическэ чIыпIэу непэ тызэрытыр къыдалъытэзэ муниципалитет пэпчъ гъунапкъэ зиIэ шапхъэхэр ащагъэнэфэныр шIокI зимыIэ Iофыгъоу зэрэщытыр Оперативнэ штабым изэхэсыгъо КъумпIыл Мурат къыщиIуагъ.
Мыекъуапэрэ Адыгэкъалэрэ инфицированнэ цIыфэу ащыпсэухэрэм япчъагъэ ащыхахъошъ, ащ фэдэ Iофыгъохэр ащызэрахьанхэ фаеу ащ ылъытагъ, анахьэу Пасхэм епхыгъэ мэфэкIхэр зыщыхагъэунэфыкIыщт мафэхэм. Ащ фэдэ лъэбэкъухэр зэрэтэрэзхэр, цIыфхэр яунэмэ арысхэмэ зэрэнахьышIур къыраIотыкIы Мыекъуапэ ыкIи Адыгэ епархием идинлэжьхэми.
Муниципалитетмэ ащыIэ къэхалъэхэр зэкIэ зэфашIыгъэх, урамхэм, къэуцупIэхэм, унэ чIэхьэгъухэм дезинфекциехэр ащашIых, пропуск нэпцIхэр цIыфхэм къаIахыжьых, общественнэ чIыпIэхэр ауплъэкIух. Ахэм афэгъэзагъэх полицием, МЧС-м, Росгвардием ыкIи дружинникхэм ащыщхэр зыхахьэхэрэ купхэр.
Къалэхэми къуаджэхэми цIыфхэр ащызэхэмыхьанхэм, ныбжьыкIэхэр гъунэгъу псэупIэхэм адэмыхьанхэм апае Iофтхьэбзэ гъэнэфагъэхэр рагъэкIокIынхэм зэхэсыгъом хэлажьэхэрэм КъумпIыл Мурат анаIэ тыраригъэдзагъ.
— ТапэкIэ тыплъэныр, пандемием къыздихьыщт гумэкIыгъохэр зэкIэ къыдэтлъытэнхэр типшъэрылъ шъхьаIэхэм ащыщ. ГурыIогъуаеп гъунапкъэ зиIэ шапхъэу дгъэнэфагъэхэр цIыфхэм къызэряхьылъэкIырэр, ау непэрэ мафэмкIэ нэмыкI хэкIыпIэ зи тиIэп. А Iоф хьылъэр Оперативнэ штабым ыпшъэ зыкIыдилъхьажьырэр цIыфхэм япсауныгъэ къэухъумэгъэным фэшI. ЗэкIэхэми мы чIыпIэ зэжъум титэу Iоф тшIэным зыфэдгъэсэн, тыфэсакъызэ экономикэр ттIупщыжьын фае, — къыIуагъ Адыгеим и ЛIышъхьэ.
— Мы мафэхэм УФ-м и Президентэу Владимир Путиным джэпсалъэу къышIыгъэм къыщиIуагъ предпринимательствэ цIыкIумрэ гурытымрэ ащылажьэхэрэмэ яIофшIэпIэ чIыпIэхэр къагъэнэжьын зыхъукIэ IэпыIэгъу зэрагъотыщтыр. Федеральнэ гупчэм а IофыгъошIум пэIухьанэу ахъщэ къытфетIупщы. Зэфагъэ хэлъэу предприятиехэм IэпыIэгъур аIэкIэдгъэхьаным пае чанэу ащ тыдэлэжьэн фае. Мэхьанэ зиIэр — IофшIэпIэ чIыпIэхэр къэдгъэнэжьынхэ тлъэкIыщт, цIыфхэр IофшIэнчъэу къэнэщтхэп, — къыкIигъэтхъыгъ КъумпIыл Мурат.
Шъугу къэдгъэкIыжьын, тапэкIэ Адыгеим и ЛIышъхьэ кIэтхэжьыгъагъ 2020-рэ илъэсым Адыгеим иэкономикэ зыпкъ итэу хэхъоныгъэ ышIыным фэгъэхьыгъэ унашъом. Коронавирусым зызэриушъомбгъурэм, ащ иягъэ къызэрэкIорэм къыхэкIэу бизнесым IэпыIэгъу фэхъугъэныр ащ къыделъытэ.