«ШIу зышIэрэм шIу фыщылъ» — еIо адыгэ гущыIэжъым. Мэзэ заулэ хъугъэу зэпахырэ уз щынагъоу коронавирусым зэрэдунаеу зэрэзэлъиштагъэр гумэкIыгъошхоу щыт.

Ащ цIыфхэр гузэжъогъу чIыпIэ ригъэуцуагъэх. Мы охътэ къиным шIушIэнымрэ гукIэгъумрэ нахь гъэпытэгъэнхэм, лъэпкъ зэфэшъхьафхэм азыфагу зэгурыIоныгъэрэ мамырныгъэрэ илъыным типащэхэр ыкIи лъэкI зи­Iэхэр дэлажьэх. Адыгеим щы­псэухэу гъот зиIэхэм шIушIэным, псэпагъэм алъэныкъокIэ Iофы- гъо макIэп мы мафэхэм зэра­хьэ­хэ­рэр. Ахэм зэу ащыщ гупы­кIы­шхо зиIэ кIалэу зигугъу къэт­шIыщтыр. IэкIыбым къикIыжьыгъэ ти­лъэпкъэгъухэр щыIэныгъэм хэгъэгъозэжьыгъэнхэмкIэ Гупчэм ипащэу ГъукIэлI Асхьад тызэрэщигъэгъозагъэмкIэ, пшъэдэ­кIыжьэу ыхьырэмкIэ гъунэпкъэ гъэнэфагъэ зиIэ обществэу «ТЕХИМПОРТ» зыфиIорэм итхьа­матэу Байбек Заурбый Хьэсанэ ыкъом игупыкIыкIэ, фирмэм иучредителэу Геворг Нахапетян игъусэу Адыгеим къэзыгъэзэжьыгъэхэ тилъэпкъэ­гъухэу, мы уахътэм чIыпIэ къин ифэгъэ ыкIи гъот макIэ зиIэ унагъохэм, ахэр 40 мэхъух, шIушIэ IэпыIэгъухэр афашIыгъэх.

— Илъэс пчъагъэ хъугъэу Байбек Заурбый хэкужъым къэ­зыгъэзэжьыгъэхэр инэплъэгъу ригъэкIыхэрэп, мэфэкI мафэхэр къэблагъэхэ хъумэ, ахэм яунагъохэм ыкIи ясабыйхэм ящыкIэгъэ шIушIэ IэпыIэгъур аре­гъэгъоты,— еIо ГъукIэлI Асхьад. — Мары, ащ ишыхьат джырэблагъэ тилъэпкъэгъухэм ащыщхэу къызтефэхэрэм гъомылапхъэхэр зэрылъ Iалъмэкъхэр зараритыгъэхэр. Ащ унагъом анахьэу ищыкIэгъэщт гъомылапхъэхэу пынджыр, шъоущыгъур, щаир, тхьацу зэмылIэужыгъохэр, хьа­джыгъэ анахь дэгъур, дагъэр, мыIэрысэр арылъых.

— ЗичIыгужъ къэзыгъэзэ­жьыхэрэм апае общественнэ Фондэу зэхэтщагъэм ыкIи Гуп­чэм ацIэкIэ Байбек Заурбый «тхьауегъэпсэушхо» етэIо. ГупыкIышхо зиIэхэу Заур фэдэ кIа­лэхэр зэрэтиIэхэр лъэшэу тигуап. «Псапэу пшIэрэр Алахьталэм къыпфегъэзэжьы». Арышъ, Тхьам тыфелъэIу, шIушIагъэу иIэр Тхьам фигъэбэгъонэу, узын­чъагъэ иIэу, гъашIэ къыритынэу, — къыIуагъ ГъукIэлI Асхьад.

— СшIогъэшIэгъоныр, тилъэпкъэгъоу къэзыгъэзэжьыгъэхэр зэкIэ, бэми макIэми Iоф амышIэу щысхэп, — еIо Асхьад. — ОрэсатыушI, орэпсэолъэшI, орэ­врач, шъхьадж IэнатIэу иIэм елъытыгъэу ыкIи зэхэдз имыIэу ыгъотырэ IофшIэныр егъэцакIэ. Iоф амышIэу, зыгорэм къафишIэщтым щыгугъыхэу щысыщтхэп. Непэ зэкIэми лэжьапкIэ къызэрахьыщтым, яунагъо зэраIы­гъыщтым, лъэпкъэу къызхэхьа­жьыгъэхэм зэрагурыIощтхэм пылъых. Непэ гузэжъогъоу зэ­рытхэри къагурэIо, тиреспубликэ закъоп, зэрэдунаеу мы уз щынагъом зэлъиштагъ. Арышъ, тащэгугъы щэIагъэ къызхагъэ­фэнхэу, чIыпIэу тызэрытыр къа­гурыIонэу, тызэдеIэжьэу ты­псэунэу.

КIАРЭ Фатим.