Коронавирусым пэшIуекIогъэнымкIэ Оперативнэ штабым изэхэсыгъоу тыгъуасэ щыIагъэр зэрищагъ Адыгэ Республикэм и ЛIышъхьэу КъумпIыл Мурат. Ар видеоконференцие шIыкIэм тетэу кIуагъэ.

Роспотребнадзорым АдыгеимкIэ и ГъэIорышIапIэ ипащэу Сергей Завгороднем къызэриIуагъэмкIэ, коронавирусыр къызпыхьагъэхэр зыIукIэгъэхэ цIыфхэр къыхэгъэщыгъэнхэм, мы зэпахырэ узым пэшIуекIогъэным фытегъэпсыхьэгъэ IофшIэныр республикэм щылъагъэкIуатэ. Джащ фэдэу Адыгеим хэгъэгу кIоцI IофхэмкIэ и Министерствэ къэбарэу къаIэкIигъэхьагъэр яIэубытыпIэу IэкIыб къэралыгъохэм къарыкIыжьыгъэхэу карантиным щыIэн фаехэр зэкIэ ауплъэ­кIугъэх.

Коронавирусыр къыхэзгъэщырэ лабораториехэми яIофшIэн зэрифэшъуашэу зэхащэ. Джы мэлылъфэгъум и 15-м щегъэжьагъэу коронавирусыр гъэунэфыгъэнымкIэ шъолъырым щызэхащэгъэ тестхэм язэфэхьысыжьхэр официальнэу алъытэх, ащ фытегъэпсыхьэгъэ тхьапэр (документыр) УФ-м и Роспотребнадзор къаритыгъ.

Республикэм щыпсэурэ нэбгырэ 8890-мэ тестхэр акIугъэх, ахэм ащыщэу 986-мэ аужырэ чэщ зымафэм. Тест-системэ мини 10-м ехъу IэпэчIэгъанэу яI. РеагентыкIэхэр къаIэкIэхьанхэу заявкэ атыгъ. Медицинэм иучреждениехэм кIуачIэу аIэкIэлъымкIэ, Iэзэгъу уцхэмкIэ, оборудованиемкIэ IэпэчIэгъанэхэм ахэгъэхъогъэным мэхьанэшхо зэриIэр АР-м и ЛIышъхьэ къыхигъэщыгъ. Ащ пае бюджет ахъщэм имызакъоу, спонсорхэм яIэпыIэгъуи зэрагъэфедэрэр къыIуагъ. Бюджетым емыпхыгъэ мылъку зэрэзэIуа­гъэкIагъэр, ащкIэ тхьабылым Iоф езыгъэшIэрэ аппаратхэр, Iэзэгъу уцхэр, зызэрэуухъумэжьыщт пкъыгъохэр, нэ­мыкI­хэр къызэращэфыщтхэр республикэм ипащэ хигъэунэфыкIыгъ.

Мы IофшIэныр гъэцэкIагъэ зэрэхъурэм Адыгеим ипащэхэм анаIэ тет. АщкIэ пшъэдэкIыжь зыхьыхэрэм ащыщ АР-м и Постпредствэу УФ-м и Президент дэжь щыIэр. Мы лъэныкъомкIэ федеральнэ гупчэм зэпхыныгъэу дыряIэм ыкIи медоборудованиер къэзыщэхэрэм Iоф зэрадашIэрэм къытегущыIагъ УФ-м и Президент дэжь щыIэ Адыгеим и Официальнэ лIыкIоу ТхьакIущынэ Мурат.

Министрэу Мэрэтыкъо Рустем къызэриIуагъэмкIэ, республикэм имедицинэ учреждениехэр пшъэрылъхэм ягъэцэкIэн фырекъух. Ау Iофхэм язытет нахь хьылъэ мэхъу. Мэлылъфэгъум и 14-м нэбгыритIумэ ядунай ахъожьыгъ. ЗымкIэ диагнозыр шъыпкъэу къычIэкIыгъ, ятIонэрэ цIыфым пэшIорыгъэшъэу коронавирусыр иIагъэу къыхагъэщыгъ, къагъэшъыпкъэжьыным фэшI анализхэр лабораторием агъэхьыгъэх. Зидунай зыхъожьыгъэхэ нэбгыритIуми япсауныгъэ изытет хьылъэ дэдагъ.

Министрэм къызэрэхигъэщыгъэу, узыр нахь псынкIэу къыхагъэщыным пае цIыфхэм игъом медицинэ IэпыIэгъу зэрагъэгъотын фае. Непэрэ мафэм ехъулIэу зэпахырэ узхэм зыщяIазэхэрэ республикэ сымэджэщым нэбгырэ 56-мэ стационар шIыкIэм тетэу ащяIазэх, 4-р — реанимацием илъых, тIур тхьабылым Iоф езыгъэшIэрэ аппаратым пыгъэнагъэх. Нэбгырэ 23-мэ амбулаторнэ шIыкIэу яIазэх. Зэпахырэ узыкIэм зэригъэсымаджэхэрэр икъу фэдизэу зэрэзэхэмыфыгъэм къыхэкIэу амбулаторнэу зэIазэхэрэм, сымэджэщым къычIатхыкIыжьыгъэхэм зэралъыплъэ­хэрэм зэхъо­кIыныгъэ фэхъугъ. Джы ахэм тIогъогогъо компьютернэ томографиер акIущт.

— Коронавирусым зызэри­ушъомбгъурэмкIэ Iофхэм язытет къызэрыкIоп, ащ осэ тэрэз фэтымышIыныр щынагъо. ГухэкI нахь мышIэми, респуб­ликэм щыщ нэбгыритIу чIэтынагъ. Ахэм ягупсэхэм ыкIи къапэблагъэхэм сафэтхьаусыхэ. Джыри зэ къыхэсэгъэщы — унашъоу тшIыгъэхэр зэкIэ зыфэгъэхьыгъэр зэпахырэ узыр къызэтедгъэуцоныр ары. Коронавирусым тыпэшIуекIоным фэшI непэ зэкIэми ты- зэготын фае. Унэхэм такъыры­мыкIмэ узым тытекIощт, тэри, тыкъэзыуцухьэрэ цIыфхэми япсауныгъэ къэтыухъумэн тлъэкIыщт. Роспотребнадзорым ишап­хъэхэр дгъэцакIэхэзэ, сымаджэхэм ящыIэныгъэ къэз­гъэнэжьыхэрэ ыкIи пандемиер къэгъэуцугъэным зикIуачIэ езыхьылIэрэ тимедикхэм IэпыIэгъу тафэ­хъущт, — къыIуагъ КъумпIыл Мурат.

ТХЬАРКЪОХЪО Адам.