Тикъэралыгъо и Конституцие гъэтэрэзыжьынхэр фэшIыгъэнхэм кIэщакIо фэхъугъэр УФ-м и Президентэу Владимир Путиныр ары.

Щылэ мазэм Джэпсалъэу къышIыгъэм ар къыщиIогъагъ, Закон шъхьаIэр къыздэкIыгъагъэм ыуж илъэсыбэ зэрэтешIагъэр, уахътэм зэхъокIыныгъэу къыздихьыгъэхэм ар зэрадимыштэжьырэр къыхигъэщызэ, анахьэу гъэтэрэзыжьын зищыкIэгъэ лъэныкъохэр къыгъэнэфэгъагъэх. Нэужым ахэм Iоф адашIагъ, агъэхьазырыгъэх, ащ фэгъэхьыгъэ хэбзэгъэуцугъэр УФ-м и Къэралыгъо Думэ ыш­тагъ.

Гъэтэрэзыжьынхэр 400 фэдиз мэхъух. ЦIыфхэр социальнэу ухъумэгъэнхэм чIыпIэ ин щеубыты. Экономикэр сыд фэдизэу къиныгъохэм ахэхьагъэми, социальнэ IэпыIэгъум къызэрэщымыкIэщтыр ащ фэгъэхьыгъэ статьяхэмкIэ къэралыгъом къе­ушыхьаты.

Пенсиехэр, социальнэ ахъщэ тын зэфэшъхьафхэр илъэсым зэгъогогъум нахь мымакIэу индексацие ашIыщтых. IэпыIэгъу зищыкIагъэ хъурэ пэпчъ, иIоф­хэм язытет къыдалъытэзэ деIэщтых. Сэкъатныгъэ зиIэхэри социальнэ IэпыIэгъум щыкIэщтхэп. Нэбгырэ пэпчъ зэрэухъумагъэр, къэралыгъом гум зэрэримынэщтыр, къызэрэдеIэщтыр сыдигъокIи зэхишIэн фае. Мыхэр зэкIэ Конституцием ия 75-рэ статья зэхэугуфыкIыгъэу ратхагъ.

Конституциер тикъэралыгъо зыздигъазэрэ ыкIи зыздигъэ­зэщт лъэныкъохэр къэзгъэлъагъохэрэ картэу плъытэн плъэкIыщт. Картэр жъы зыхъукIэ уигъэгъо­щэщт, ухигъэукъощт. Арышъ, ар бгъэкIэжьыныр, уахътэм диштэу бгъэпсыжьыныр шIокI зимыIэ Iофэу мэхъу.

Закон шъхьаIэм тищыIэныгъэ непэ зыфэдэр, къыткIэхъухьэрэ лIэужхэм ящыIакIэ неущ зыфэдэщтыр къегъэлъагъо. Мы ЗаконымкIэ тыщыI. Ащ гъэтэрэзыжьынэу фашIыгъэхэм тыма­къэхэр афэттыхэмэ, тызэрэухъу­мэгъэщтым тымакъэ фэтты­гъэу мэхъу.

(Тикорр.).