Адыгеим ичIыгулэжьхэм гъэтхэсэ гектар 102657-рэ мыгъэ апхъынэу агъэхьазырыгъ.

АР-м мэкъу-мэщымкIэ и Министерствэ мэлылъфэгъум и 15-м тызэрэщигъэгъозагъэмкIэ, ащ ызыныкъор, гектар 51140-р, халъхьэгъах. Коронавирусым зызэриушъомбгъурэм Iофыгъоу къыхьырэм хахъо нахь мышIэми, ощххэм амыгъэохъухэмэ, IофшIэнхэр къызэтырагъэуцохэрэп.

Шэуджэн районым ичIыгулэжьхэм анахьыбэу хагъэкIыгъ, мы мафэхэм ахэр ары пэрытныгъэр зыIыгъыр. ПстэумкIи апхъынэу агъэнэфэгъэ гектар 13900-м ызыныкъом ехъу, 9358-рэ, халъхьагъ. Нахьыбэр тыгъэгъаз, гектар 7550-рэ мэхъу, адрэхэр лэжьыгъэ чылапхъэ ашIыщт натрыф, зэнтхъы, былымIусхэр зыхашIыкIыщт уцых, хэтэрыкIых.

Кощхьэблэ, Джэджэ ыкIи Мыекъопэ районхэм ячIыгулэжьхэми мымакIэу гъэтхасэхэм ахагъэкIыгъ. Кощхьэблэ районым щагъэнэфэгъэ гектар 16610-м ипроцент 62-р, ар 10320-рэ, апхъыгъах. Инахьыбэр, гектар 6522-р, тыгъэгъаз, зэнтхъымрэ гъэтхэсэ хьэмрэ чIыгум рагъэкIугъах, чылапхъэ ашIыщт натрыфым гектар 2850-рэ хагъэкIыгъ.

Джэджэ районым ичIыгулэжьхэм адрэхэм анахьыбэу илъэс къэс гъэтхасэхэм арагъэубыты. Мыгъэ агъэнэфэгъэ гектар 26351-м щыщэу 14100-р апхъыгъах.

Мыхэм ягъэпшагъэмэ, Мыекъопэ районым гъэтхэ лэжьыгъэхэм афигъэхьазырыгъэр бэп, пстэумкIи гектар 6282-рэ мэхъу. Ащ щыщэу 3621-р халъхьэгъах.

ХЪУТ Нэфсэт.