Узым зимыушъомбгъуным пае
Муниципальнэ образованиеу «Адыгэкъалэ» ипащэу ЛIыхэсэ Махьмуд 2020-рэ илъэсым мэлылъфэгъум и 14-м ышIыгъэ унашъоу № 199-р зытетым къызэрэщыдэлъыта- гъэмкIэ, зэпахырэ узэу коронавирусым зимыушъомбгъуным тегъэпсыхьагъэу мэлылъфэгъум и 15-м къыщегъэжьагъэу къэлэдэсхэм Адыгэкъалэ къабгынэ хъущтэп.
КъэIогъэн фае Iоф зышIэхэрэр ахэм къазэрахимыубытэхэрэр. Джащ фэдэу мы къалэм къыдэхьанхэ фитхэп зыдэщыIэхэ ыкIи зыщыпсэурэ чIыпIэмкIэ регистрацие амышIыгъэхэр, муниципальнэ образованиеу «Адыгэкъалэ» иадминистрацие ипропуск зимыIэ транспортхэр. Т.Хь. Цуякъом ыцIэ зыхьырэ урамым, урамхэу Промышленнэм, Советскэм, автомобиль гъогоу «Инэм — Бжъэдыгъухьабл» зыфиIорэм (кафеу «Жемчужинэм» дэжь) языпырыкIыпIэхэр, федеральнэ трассэу М-4 «Дон» зыфиIорэмкIэ къалэм къызэрэдэхьэхэрэ гъогухэр (урамхэу Пролетарскэр, Комсомольскэр, Ким, Новоселовым яурамхэр) зэфашIыщтых.
Муниципальнэ образованиеу «Адыгэкъалэ» дэсхэм азыныкъо нахьыбэмэ къалэм щызекIонхэ залъэкIыщтыр сыхьатыр 10-м къыщегъэжьагъэу сыхьатыр 16-м нэс. Къалэхэу Москварэ Санкт-Петербургрэ къарыкIхи Адыгэкъалэ къэкIуагъэхэр мэфэ 14-м къыкIоцI цIыфхэм ахэхьанхэ фимытхэу, ахэм япсауныгъэ изытет ренэу гъунэ лъафынэу унашъом итхагъ.
Адыгэкъалэ ипащэ цIыфхэм къялъэIу мэлылъфэгъум и 15-м къыщегъэжьагъэу къэхалъэм нахь макIэу кIонхэу, коронавирусым зимыушъомбгъунымкIэ шъэпхъэ гъэнэфагъэхэр агъэцэкIэнхэу. Джащ фэдэу ЛIыхэсэ Махьмуд джыдэдэм Iоф зышIэрэ организациехэм япащэхэм игъо афилъэгъугъ лэжьакIохэм япсауныгъэ изытет мафэ къэс ауплъэкIунэу. Ащ Адыгэкъалэ дэт сымэджэщэу К.М. Батмэным ыцIэ зыхьырэм иврач шъхьаIэ игъо филъэгъугъ мэлылъфэгъум и 15-м къыщегъэжьагъэу ясымэджэщ хэт поликлиникэр дезинфекцие ашIыфэ нэс медицинэ фэIо-фашIэхэр амыгъэцэкIэнхэу.
***
Адыгэ Республикэм псауныгъэр къэухъумэгъэнымкIэ иминистрэу Мэрэтыкъо Рустем къызэриIотагъэмкIэ, шъолъырым исанитар врач шъхьаIэ унашъоу ышIыгъэм диштэу коронавирусым пэшIуекIогъэнымкIэ щыIэ режимыр Адыгэкъалэ джыри нахь щагъэлъэшыгъ. АдыгеимкIэ коронавирусыр къызпыхьагъэхэм гурытымкIэ якъэгъэлъэгъон ебгъапшэмэ, Адыгэкъалэ а пчъагъэр фэдэ заулэкIэ щынахьыб.
— Непэрэ мафэм ехъулIэу мы зэпахырэ узыр муниципалитетым щыпсэурэ нэбгырэ 12-мэ къахагъэщыгъ. Ахэм ащыщэу 6-мэ — стационарым щяIазэх, адрэ нэбгыри 6-мэ — амбулаторнэ медицинэ IэпыIэгъу арагъэгъоты. Ащ къыхэкIыкIэ режимыр зэрагъэлъэшыгъэр министрэм къыхигъэщыгъ. Коронавирусыр апэу къызпыхьагъэр Адыгэкъалэ дэт межрайон сымэджэщым иполиклиникэ Iоф щызышIэхэрэм ащыщ. Ар зыIукIагъэхэм, зыдэгущыIагъэхэм алъэныкъокIэ уплъэкIунхэр зэхэтщагъэх, ахэр дгъэтIысыгъэх. Джащ фэдэу дезинфекцием епхыгъэ Iофтхьабзэхэр зэхэтщагъэх, чIыпIэхэр дгъэкъэбзагъэх, тлъэкIыгъэх. Аужырэ генеральнэ гъэкъэбзэным ыуж поликлиникэр къызэIутхыжьыщт. Сымаджэм емыкIолIагъэхэм Iоф ашIэщт, адрэхэр мэфэ 14-рэ карантиным щысыщтых. Зэпахырэ узым тыпэшIуекIоным, къызэтедгъэуцоным амалэу тиIэр зэкIэ етхьылIагъ, — къыIуагъ Мэрэтыкъо Рустем.