Адыгэ Республикэм и ЛIышъхьэ и Указэу коронавирусым къыпкъырыкIырэ узхэм зямыгъэушъомбгъугъэным ехьылIагъэм игъэцэкIэнкIэ Iофтхьабзэхэр джыдэдэм Адыгеим щылъагъэкIуатэх.

Мы лъэныкъомкIэ анахьэу анаIэ зытырагъэтыхэрэр цIыф­хэм япсауныгъэрэ ящынэгъончъагъэрэ къэухъумэгъэнхэр, медицинэ учреждениехэм яамал­хэм зыкъягъэIэтыгъэныр, экономикэр зэщымыгъэкъогъэныр, цIыфхэм яхахъохэмрэ IофшIапIэхэмрэ къызэтегъэнэ­жьыгъэнхэр ары.

Хэгъэгум и Президентэу Владимир Путинымрэ Адыгэ Республикэм и ЛIышъхьэу Къум­пIыл Муратрэ пшъэрылъхэу къагъэуцугъэхэм язэшIохын республикэм изаконодательнэ хабзэ идепутатхэр хэлажьэх. Ахэм муниципальнэ образованиехэм ащыпсэухэрэмрэ япащэхэмрэ зэпхыныгъэ адыряI, ялъэIухэмрэ яшIоигъоныгъэхэм­рэ афагъэцакIэх. Зэпахырэ узым зыкъызыщиштэгъэ лъэхъа­ным гъэсэныгъэмкIэ, медицинэмкIэ учреждениехэм, район, шъолъыр, федеральнэ ведомствэхэм, предприятиехэм япащэхэу, яIофышIэхэу, бизнесменхэу ахэм якъулыкъу пшъэ­рылъхэр агъэцакIэх.

Республикэм и ЛIышъхьэу Къум­пIыл Мурат Адыгэ Респуб­ликэм и Къэралыгъо Совет — Хасэм гъэтхапэм иIэгъэ зэхэсыгъом хэлажьэзэ, депутатхэм, гъэцэ­кIэкIо хабзэм икъулыкъухэм, муниципалитетхэм ялIыкIохэм анаIэ тыраригъэдзагъ хабзэм икъутэмэ пстэуми зэдырагъэштэным, ко­ронавирусым ыпкъ къикIыкIэ шэпхъэ гъэнэфагъэ­хэм зыщатехьэгъэхэ лъэхъаным цIыфхэм япсауныгъэ къэухъумэгъэным тегъэпсыхьэгъэ Iоф­тхьабзэхэм язехьан мэхьанэ­шхо зэряIэм.

Непэ парламентариехэр дезинфекцием епхыгъэ Iофыгъо­хэмкIэ муниципалитетхэм IэпыIэгъу афэхъух. ЦIыфхэм зэдагъэфедэрэ чIыпIэхэр, фэтэрыбэу зэхэт унэхэри ахэм зэрахэтхэу, компрессор техни­кэкIэ дезинфекцие псынкIэу ашIых.

Парламентым идепутатэу Къэгъэзэжь Мурат районхэм яадминистрациехэм, цIыфхэм зэрадеIэхэрэм къатегущыIэзэ, IэпыIэгъу лые зэрэмыхъурэр къыIуагъ. Ащ ишIошIкIэ, тиджырэ лъэхъан производственнэ ыкIи мыпроизводственнэ учреждениехэр дезинфекцие шIыгъэнхэ фае. Адыгэ Респуб­ликэм и ЛIышъхьэ зипэщэ Оперативнэ штабым унашъо зэришIыгъэм тетэу Роспотребнадзорым игъоу къафилъэгъу­хэрэр дэх имыIэу агъэцакIэхэ зыхъукIэ, предприятиехэм, бэ­дзэрхэм, общественнэ транспортым, гъогу, псэолъэшIын отраслэхэм, ЖКХ-м яорганизацие заулэмэ яIофшIэн падзэ­жьын алъэкIынэу рахъухьагъ. (Дезинфекцие Iоф­тхьабзэхэр Шэуджэн районым щызехьэгъэн­хэмкIэ Къэгъэзэжь Мурат IэпыIэгъу афэхъугъ).

Парламентариехэм яунэе мылъкукIэ социальнэу дэеу ухъумэгъэ цIыфхэм гъомылапхъэхэр къафащэфых ыкIи нэмыкI IэпыIэгъухэр аратых. Волонтерхэмрэ Адыгэ Респуб­ликэм цIыфхэр социальнэу ухъумэгъэнхэмкIэ и Министерствэ испециалистхэмрэ ахэр аIэкIагъахьэх. Дондуковскэ элеваторым ипащэу, Адыгэ Республикэм и Къэралыгъо Совет – Хасэм идепутатэу Болэкъо Мухьамэдрэ ащ иIоф­шIэгъухэмрэ Джэджэ районым исхэм гъомылапхъэкIэ IэпыIэгъу афэхъух. Кощхьэблэ районымкIэ депутатэу Зыхьэ Зураб, Теуцожь районымкIэ – Хьабэхъу Юрэ, Тэхъутэмыкъое районымкIэ – Шэуджэн Сэфэр, Мыекъо­пэ районымкIэ – Карэн Мнацаканьян ыкIи нэмыкI депутатыбэмэ ащ фэдэ шIушIэным къыдырагъэштагъ.

– Урысые Iофтхьабзэу «ЗэкIэми тызэгъус» зыфиIорэм къыдыхэлъытагъэу, Адыгэ Республикэм и ЛIышъхьэ пшъэрылъ зэрафишIыгъэм тетэу коронавирусым ыпкъ къикIыкIэ чIыпIэ къин ифагъэхэм адеIэх. Ащ фэдэ IэпыIэгъу зэратыхэрэр зыныбжь илъэс 65-м къехъугъэу зизакъоу псэухэрэр, гъот ма­кIэ зиIэ унагъохэр, сэкъатныгъэ зиIэхэр ары. Гъомылапхъэхэмрэ цIыфхэр анахьэу зыфэныкъо товархэмрэ муниципалитетхэм ащыпсэухэрэм мафэ къэс аIэкIагъахьэх, – къы­Iуагъ Адыгэ Республикэм и Къэралыгъо Совет – Хасэм идепутатэу Хьабэхъу Юрэ.

Коронавирусым зыкъызыщиштэгъэ лъэхъаным медицинэ IофышIэхэм IэпэIэсэныгъэ инрэ цIыфыгъэшхорэ зэряIэр къэлъэ­гъуагъ. Чэщи, мафи ямыIэу сымаджэ пэпчъ ипсауныгъэ зэтегъэуцожьыгъэным ахэр фэбанэх. Мы мафэхэм дезинфицирующэ амалхэмрэ мас­кэхэмрэ якъызIэкIэгъэхьанкIэ депутатхэр медицинэ учреждениехэм IэпыIэгъу афэхъух.

– Яунэхэм арысынхэмкIэ шапхъэр республикэм щыпсэухэрэм къызыдамылъытэкIэ, коронавирусым пэуцужьыгъэнымкIэ кIэухышIухэм псынкIэу такъыфэкIон тлъэкIыщтэп. Непэ медицинэ IофышIэхэм типсауныгъэкIэ пшъэдэкIыжьышхо ахьы, ахэм ящынэгъончъагъэ тэркIэ мэхьанэшхо иI, – къыIуагъ Адыгэ Респуб­ликэм и Къэралыгъо Совет – Хасэм и Тхьаматэ игуадзэу Шъао Аскэр.Инэм дэт сымэджэщым маскэ мин ащ ритыгъ.

Адыгэ Республикэм и Къэралыгъо Совет – Хасэм изэ­хэсыгъо унашъо зэрэщаштагъэм тетэу депутатхэм яунэе мылъкукIэ республикэм ипарламент фондэу щызэрагъэуIурэр коронавирусым пэуцужьыгъэным епхыгъэ Iофтхьабзэхэм апэIу­хьащт.

Адыгэ Республикэм щыпсэухэу лъытэныгъэ зыфэтшIы­хэрэр! «Линие плъырым» ителефонэу 8-800-200-34-11-м респуб­ликэм Iоф щешIэ. Зы­ныбжь хэкIотагъэхэм, зекIон зымылъэкIыхэрэм гъомылапхъэхэм, Iэзэгъу уцхэм, на­хьыбэу зыфэныкъохэрэ товар­хэм якъэщэфынкIэ ыкIи ядэжь ахэр къэщэжьыгъэнхэмкIэ IэпыIэгъу зэрэкIэлъэIухэрэм фэгъэхьыгъэ заявкэхэр къатынхэ алъэкIыщт. Джащ фэдэу коммунальнэ фэIо-фашIэхэм ыкIи нэмыкIхэм ятынкIэ волонтерхэмрэ общественник­хэмрэ ахэм IэпыIэгъу къа­фэхъущтых.