Адыгеим и ЛIышъхьэ и Указэу «Коронавирусым зимыушъомб­гъу­ным­кIэ Iофтхьэбзэ тедзэхэр зехьэгъэнхэм ехьылIагъ» зыфиIорэм ты­гъуасэ кIэтхагъ. Ащ къызэрэщыдэлъытагъэмкIэ, къалэхэу Москва е Санкт-Петербург ащыIагъэхэу республикэм къихьажьыхэрэм мэфэ 14-м къыкIоцI цIыфхэм ахэмыхьанхэмкIэ шапхъэр зэрагъэцакIэрэм гъунэ лъафыщт.

АР-м щыпсэухэрэр яунэхэм арысынхэ, нэмыкI шъолъырхэм къарыкIыгъэхэр чIыпIэу къыз­дэ­кIуагъэхэм (амал щыIэ зыхъу­кIэ) е обсерваторым ащыIэнхэ фае.

Ащ фэдэ шапхъэхэр зымыгъэцакIэхэрэм админист­ративнэ пшъэдэкIыжь арагъэ­хьыщт.

Зигугъу къэтшIыгъэ къалэхэм къарыкIхэу Адыгеим къакIохэрэм республикэм къызэри­хьагъэхэмкIэ «линие плъырым» ителефонхэу 8-800-555-49-43-мкIэ, 8(8772) 52-12-05-мкIэ псынкIэу макъэ къагъэIун фае.

Джащ къыщегъэжьагъэу шэпхъэ гъэнэфагъэр заукъокIэ, ахэм юридическэ пшъэдэкIыжь арагъэхьыщт. Япсауныгъэ изытет нахь дэй зыхъукIэ, медицинэ учреждениехэм мыкIохэу, ахэм медицинэ IэпыIэгъу къаратынэу зафагъэзэн фае.

Къалэхэу Москва, Санкт-Петербург къарыкIыгъэхэу Краснодар иаэропорт къэсыгъэхэр Адыгэ Республикэм къэзыщэнхэу пшъэрылъ зыфашIыгъэр Адыгэ Республикэм IофшIэ­нымкIэ ыкIи социальнэ хэхъоныгъэмкIэ и Министерств ары. АщкIэ мы ведомствэм санитар-эпидемиологие шапхъэхэм адиштэрэ транспорт иI.

Федеральнэ хэбзэгъэуцугъэм диштэрэ шапхъэхэр къыдэлъы­тэгъэнхэм пае Адыгэ Рес­пуб­ликэм и МВД Роспотребнадзорым макъэ ригъэIузэ ышIыщт зигугъу къэтшIыгъэ къалэхэм цIыфхэр автомобиль транспорткIэ къарыкIыхи, республикэм къызэрэкIуагъэхэм афэгъэхьыгъэу.

Зигугъу къэтшIыгъэ къалэхэм къарыкIхи, автомобилькIэ Адыгеим къихьагъэхэми цIыф­хэм ахэмыхьанхэмкIэ шапхъэр замыгъэцакIэкIэ, юридическэ пшъэдэкIыжь арагъэхьыщт.