Тыгъуасэ щегъэжьагъэу сабыйхэр зэрыс унагъохэу пособие къызытефэхэрэм зэтыгъо ахъщэ тынхэр Адыгеим ащаратынхэу рагъэжьагъ. Сабыищ е нахьыбэ зиIэхэм сомэ минитф, зы сабый е тIу зиIэхэм сомэ минищ аратыщт.

Гъэлъэшыгъэ шIыкIэм ирежим илъэхъан цIыфхэм IэпыIэгъу афэхъу­гъэным фэшI Адыгэ Рес­публикэм и ЛIышъхьэу КъумпIыл Мурат ипшъэ­рылъкIэ АР-м иминист­рэхэм я Кабинет мыщ фэдэ унашъо ышIыгъ.

Зэтыгъо ахъщэ Iэпы­Iэгъур къыпIэкIэхьаным фэшI документхэр зыми епхьылIэнхэ е къулыкъу горэм зыфэбгъэзэн ищыкIагъэп — шъолъырым щагъэнэфэгъэ урыпсэунымкIэ ахъщэ анахь ма­кIэм яхахъохэмкIэ (зы нэбгырэм телъытагъэу) кIэмыхьэхэрэ унагъохэу — кIэлэцIыкIу пособие къызэратыхэрэм мы тыныр автоматическэу къа­IэкIэхьащт. КIэлэцIыкIу по­собиер къызэрагъэхьэрэ счетым ахъщэр занкIэу ихьащт.

— Непэ чIыпIэу тызэ­рытым илъэхъан гъот макIэ зиIэ унагъохэм къин зэралъэгъурэр, ахэм ти­IэпыIэгъу зэрящыкIагъэр дэгъоу къыдгурэIо. Ащ къыхэкIыкIэ ахэм зэтыгъо IэпыIэгъу тафэхъунэу унашъо сшIыгъэ. Ар унэгъо мин 11 фэдизмэ алъыIэсыщт, ахэм сабый мин 22-м ехъу арыс. Мы пшъэ­рылъым игъэцэкIэн рес­публикэ бюджетым къы­хэхыгъэ сомэ миллион 40-м ехъу пэIудгъэхьащт, — къыIуагъ Адыгеим и ЛIышъхьэу КъумпIыл Мурат.

Шъугу къэдгъэкIыжьын, УФ-м и Президентэу Владимир Путиным иунашъо диштэу, илъэси 3-м щегъэ­жьагъэу 7-м нэс зыныбжь кIэлэцIыкIухэм мэкъуогъум щегъэжьагъэу мазэ къэс федеральнэ тынхэр аратыхэзэ ашIыщт. Шъолъырым урыпсэунымкIэ ахъ- щэ анахь макIэу щагъэнэ­фагъэм ипроцент 50 ар хъущт е сомэ 4799-рэ. Тызыхэт илъэсым ищылэ мазэ щыублагъэу ар къафалъытэщт.

Адыгэ Республикэм и ЛIышъхьэ ипресс-къулыкъу