Адыгеим унэм къимыкIыхэу зэрисхэм ире­жим нахь лъэшэу лъыплъэнхэу рагъэжьэщт. Ар анахьэу водительхэм аукъоу къыхагъэщыгъ.

Адыгэ республикэм хэгъэгу кIоцI IофхэмкIэ иминистрэу Владимир Алай къызэриIуа­гъэмкIэ, мы блэкIыгъэ зыгъэ­псэфыгъо мэфэ закъохэм Къэралыгъо автоинспекторхэм къекIокIыхэ зэрэмыхъущтхэр зэрыт тхьапэхэр нэбгырэ 250-мэ къафыратхыкIыгъ.

ПэшIорыгъэшъ Iофтхьабзэхэр гъэлъэшыгъэнхэм дакIоу шапхъэхэр зымыгъэцакIэхэрэм санкциехэр атыралъхьащтых. Санитарнэ-эпидемиологие шап­хъэхэр зыукъохэрэм протокол­хэр афызэхэзгъэуцощтхэр агъэ­нэфагъэх.

Пасхэм ыкIи ащ ыпэрэ мэфэкI тхьамафэм пэшIорыгъэшъ Iофтхьабзэу зэрахьащтхэм хэу­шъхьафыкIыгъэу анаIэ атырагъэтыщт. Ащ пае Адыгэ ыкIи Мыекъопэ епархием тхьэ­шIошъхъуныгъэр зиIэхэм мэфэкIыр унэм къимыкIыхэу хагъэу­нэфыкIынэу зэрэщытымкIэ ма­къэ аригъэIугъ. Мыщ ыпаIокIэ зэпахырэ узэу COVID-19-м зы­зэриушъомбгъурэм къыхэкIыкIэ диныр зылэжьыхэрэр чы­лысхэм мыкIонхэу Москва ыкIи зэрэ Урысыеу я Патриархэу Кирилл зафигъэзагъ. Мыр уз щынэгъошхоу зэрэщытыр ащ къыхигъэщыгъ.

Iэшъынэ Сусан.