УФ-м и Президент иунашъо тетэу, илъэси­щым зыныбжь шIомыкIыгъэ кIэлэцIыкIу зэрыс унагъохэм мэлылъфэгъум къыщыублагъэу мэ­­къуогъу мазэм ыкIэм нэс ахъщэ IэпыIэгъоу сабый пэпчъ сомэ 5000 къыфэкIощт.

Ны мылъкум исертификат бэдзэгъу мазэм шIомыкIэу къы­зэратыгъэ пстэуми, зыгъэфе­дэгъахэхэри ахэтхэу, ащ фэдэ IэпыIэгъу агъотыщт. Коронавирусым Iофыгъоу цIыфхэм къафихьыгъэхэр нахь псынкIэ къа­фэхъунхэм фэшI федеральнэ бюджетым къыхэхыгъэу ар къатыщт. Мы ахъщэр ны мылъкум къыщыдэлъытагъэм къы­хэхыгъэу щытэп, арышъ, ащ къыщыкIэщтэп. Унагъом гъотэу иIэри къыдалъытэщтэп, зэкIэми зэфэдэу къафэкIощт.

УФ-м ПенсиехэмкIэ ифонд ипащэу Максим Топилиным къызэриIуагъэмкIэ, чIыпIэ органхэм амалэу яIэм тетэу, уна­гъоу кьызтефэхэрэм макъэ арагъэIущт. Ахэр пстэумкIи миллиони 2-рэ 300-рэ мэхъух.

Мы IэпыIэгъур кьыуатыным ищыкIагъэр лъэIу тхылъ птынэу ары ныIэп, адрэ пстэури специалистхэм агъэхьазырыщтых. Iоныгьо мазэм нэс тхылъхэр фондым ыштэщтых. Мэ­къуогъур текIыгъэми, зэхэубытагъэу къатыжьыщт.

ЛъэIу тхылъыр фондым иинтернет нэкIубгъоу «es.pfrf.ru» зыфиIорэм е порталэу gosuslugi.ru ащыптын плъэкIыщт. Фондым икъулыкъоу цIыфхэм Iоф адэзышIэрэми тхылъыр аштэщт, ау ахэм уякIолIэным ыпэкIэ зябгъэтхымэ нахьышIу. Ари «унэе кабинетымкIэ» е «линие плъырым» ителефонхэм ащыщкIэ зэшIопхынэуи амал щыI.

Къызэратыщтхэм­кIэ щысэхэр къэтхьыных

ГущыIэм пае, унагъом сабыитIу ис, зым илъэситIу ыныбжь, адрэр 2020-рэ илъэсым ищылэ мазэ къэхъугъ. ЛъэIу тхылъыр мэлылъфэгъу мазэм атыгъ. Ащ къыщыублагъэу сабыйхэм сомэ мин тфырытф мэзищым къа­фэкIощт. ПстэумкIи сомэ 30000 мэхъу къаратыщтыр. Унагъом лъэIу тхылъыр Iоныгъо мазэм ытыгъэми, ар зэхэубытагъэу зэтыгъокIэ къыратыжьыщт.

Джыри зы щыс. Унагъом сабыищ ис, нахьыкIитIур щылэ мазэм къэхъугъэх, анахьыжъым жъоныгъуакIэм ыныбжь илъэсищ мэхъу. Мэлылъфэгъумрэ жъоныгъуакIэмрэ мазэ къэс сомэ 15000 къаратыщт, мэкъуогъум нахьыкIитIум апае сомэ 10000 къафэкIощт.

УФ-м ПенсиехэмкIэ ифонд и Къутамэу АР-м щыIэм ипресс-къулыкъу