Коронавирусым пэшIуекIогъэным фэшI предприятиехэм зэхащэн фэе пэшIорыгъэшъ Iофтхьабзэхэм яшапхъэ (Стандарт) Адыгеим щащтагъ.

Ащ лъэныкъо зэфэшъхьафхэр къыдыхэлъытагъэх. ГущыIэм пае, мафэ къэс IофшIэгъу сменэр рагъэжьэным ыпэкIэ IофшIакIом итемпературэ ауплъэкIун фае. Ар дэкIоягъэу е зэпахырэ узыр къыпыхьагъэу нэшанэхэр щыIэхэ зыхъукIэ, шIокI имыIэу охътэ гъэнэфа­гъэкIэ IофшIапIэм IуагъэкIын фае.

IофшIакIом, ащ унагъом къы­дисхэм япсауныгъэ изытет гъэу­нэфыгъэн, IэкIыб къэралыгъохэм е Урысыем инэмыкI шъолъырхэм къарыкIыжьы­гъэхэм аIукIагъэхэмэ зэгъэшIэгъэн фае.

IофшIакIом ыIэхэр антисептикхэмкIэ зыщитхьакIын ылъэкIыщт чIыпIэ предприятием ичIэхьэгъу дэжь щагъэпсын е дезинфекцие зэрашIырэ пкъыгъохэр (салфеткэхэр) цIыфым IэкIагъэхьанхэ фае.

IофшIакIохэм, цIыфхэм азыфагу метрэ 1,5-м нахь мымакIэу дэлъын фае. Шхэгъу ыкIи зыгъэпсэфыгъо уахътэхэм Iоф­шIакIохэм якъекIокIын шэпхъэ гъэнэфагъэхэм адиштэн фае, джащ фэдэу объектым ыкIоцI удэкIыныр амалэу щыIэмкIэ щыгъэзыегъэн фае. IофшIэн уахътэм телъытагъэу IофшIакIом маскэхэр ыкIи Iалъэхэр, нэ­мыкI дезинфекцие зэрашIырэ пкъыгъохэр IэкIэгъэхьэгъэнхэр пшъэ­рылъ шъхьаI.

Мафэ (сменэ) къэс общественнэ чIыпIэхэр гъэкъэбзэгъэн­хэр, жьы къарыгъэхьэгъэныр.

Зэпахырэ узым пэшIуекIогъэ­ным фэшI шапхъэу, унашъоу щыIэхэр гъэцэкIэгъэнхэм мэхьанэшхо иI. Къэбар шъыпкъэ зэжъугъэшIэнэу шъуфаемэ, къулыкъу ыкIи ведомствэ зэфэшъхьафхэм яофициальнэ сайтхэм шъуарыхьан шъулъэкIыщт. Охътэ гъэнэфагъэкIэ IофшIапIэм IуагъэкIыхэрэм ащыщых зы­ныбжь илъэс 65-м ехъугъэхэр, хэужъыныхьэгъэ уз зиIэхэр, зииммунитет къеIыхыгъэхэр, лъэрымыхьэхэр.