УФ-м и Конституцие гъэтэрэзыжьынхэр фэшIыгъэнхэм епхыгъэ предложение Урысыем и Президентэу Владимир Путиным къыхьыгъ. Мэлылъфэгъум и 22-м мыщ фэгъэ­хьыгъэу цIыфхэм амакъэ атынэу щытыгъ. Ау зэпахырэ узэу коронавирусым ыпкъ къикIыкIэ ар зэкIахьагъ, мафэри гъэнэфагъэгоп.

Ау къэралыгъом щыпсэухэ­рэм мы Iофыгъом мэхьанэшхо раты, Конституцием гъэтэрэзыжьынхэр фэшIыгъэнхэм дырагъаштэ. МыщкIэ еплъыкIэу иIэхэр къыриIотыкIыгъ Адыгеим инахьыжъхэм я Совет итхьаматэу ГъукIэлI Нурбый.

— УФ-м и Президентэу Владимир Путиным Конституцием зэхъокIыныгъэхэр фэшIыгъэнхэр ежь ышъхьэ къырихыгъэхэп. Мыщ фэдэ гупшысэ ышIыным ыпэкIэ къэралыгъом щыпсэурэ цIыфыбэхэм заIуигъэкIагъ, ахэм ягумэкIыгъохэр, яеплъыкIэхэр арых зэблэхъуныгъэхэм лъапсэ афэхъугъэхэр.

ЗэхъокIыныгъэхэм зэрифэшъуашэу атегущыIэнхэм, къэралыгъом щыпсэухэрэм яеплъы­кIэхэр къыраIотыкIынхэм фэшI IофшIэкIо куп зэхащагъ. Ащ хэхьэгъэ Дунэе Адыгэ Хасэм и Президентэу Сэхърэкъо Хьаути Адыгеим щыIагъ, респуб­ликэм щыпсэухэрэм гущыIэгъу афэхъугъ, яеплъыкIэхэм защигъэгъозагъ. Ащ фэдэу лъэны­къоу щыIэр зэкIэ къыщызэлъыубытыгъэ зыхъукIэ, Конституциеми нахь кIуачIэ иIэ хъущт. Зэхъо­кIыныгъэхэр зэкIэ зыфэгъэхьыгъэхэр цIыфхэм ящыIэ-псэукIэ нахьышIу зэрэхъущтыр ары. Зыныбжь хэкIотагъэхэр социальнэу ухъумэгъэнхэр, хэгъэгум гъэсэныгъэ-пIуныгъэу илъым ылъапсэ нахь агъэпытэным, ныбжьыкIэхэм хахъо иIэу ар лъагъэкIотэным зэхъокIыныгъэ­хэр фытегъэпсыхьагъэх. Хэгъэ­гум ылъапсэ зыгъэпытэхэрэм уасэ афэпшIын, ахэм унаIэ атебгъэтын фае.

Джащ фэдэу Урысыем щыпсэурэ цIыфхэр егъэгумэкIых ыкIи рыразэхэп IэнэтIэшхо зыIыгъ пащэхэм нэмыкI къэралыгъохэм ягражданствэ яIэу зэрэщытыр. Зикъэралыгъо шIу зылъэгъурэ цIыфыр ары ащ ихэхъоныгъэ фэбэнэщтыр. Арышъ, пшъэ­дэкIыжь зыпылъ IэнатIэхэм аIутхэм алъэныкъокIэ шэпхъа­кIэу къагъэнафэхэрэр тэрэзхэу сэлъытэх. НэмыкI къэралыгъом игражданствэ зэриIэ закъор арэп, IэкIыб счет къызэIуихыныри ащ къыдыхэлъытагъ.

Гъонэжьыкъо Сэтэнай.