Коронавирусым пэшIуекIогъэнымкIэ Урысыем и Президентэу Владимир Путиным лъэбэкъоу ышIыгъэхэм цIыфхэм дырагъаштэ. Мы уз щынагъом пэуцужьыгъэнымкIэ Адыгеим и ЛIышъхьэу КъумпIыл Мурати унэшъо гъэнэфагъэхэр ышIыгъэх. А пстэуми шIуагъэ къызэратыщтым гущыIэгъу тызыфэхъугъэ цIыфхэм яцыхьэ телъ.   — Джырэ уахътэ тиIофшIэн нахь хьылъэ хъугъэ, — къыти­Iуагъ Адыгэ Республикэм щыпсэухэрэ къэндзалхэм культурэмкIэ якупэу «Дуслыкым» ипащэу, медицинэм иIофышIэу Алям Ильясовым. — Сымэджэщым сыщыIэу лъыдэкIуае зиIэхэм, лъынтфэхэм агъэ­гумэкIыхэрэм салъэплъэ, сишIуагъэ ясэгъэкIы. Коронавирусыр уз щынагъоу щыт. Сэ анахьэу непэ сызфэгъэзагъэр цIыфхэм рэхьат яIэныр ары. Алям Ильясовым зэрилъытэрэмкIэ, уз хьылъэу дунаим къыщекIокIырэм нэжъ-Iужъхэм ямызакъоу ныбжьыкIэхэр, кIэлэцIыкIухэр егъэгумэкIых. ЦIыфым рэхьат зэримыгъотылIэ, къиныгъо иIэу псэу зыхъукIэ, ипсауныгъэ изытет къеIыхы. ГущыIэ фабэкIэ цIыфым уеIэзэным имэхьанэ хэпшIыкIэу зыкъиIэтыгъэу Алям Ильясовым къытиIуагъ. Ары, гущыIэри Iэзэгъу. ГущыIэ дахэм дэир пщегъэгъупшэ, кIуачIэ къыпхелъхьэ. Адыгэмэ зэраIоу, гущыIэ дахэм гъучIыр къегъэщы. ЦIыфхэм ягушъхьэ кIуачIэ зыкъиIэтынэу, япсауныгъэ нахь пытэнэу афэтэIо. ЕмтIылъ Нурбый.