Коронавирусым цIыфхэр щыухъумэгъэнхэм фэгъэхьыгъэ Iофыгъоу зэрахьэхэрэм къадыхэлъытагъэу Урысыем ишъолъырхэм IэпыIэгъу псынкIэм иавтомобиль 1200-рэ къафащэфынхэу Правительствэм уна­шъо ышIыгъ.

УФ-м и Къэралыгъо Думэ и Тхьаматэу Вячеслав Володиным Правительствэм унашъоу ышIыгъэм дыригъэштагъ.

— Сыд фэдэрэ лъэныкъокIэ Iофым укъекIолIагъэми, мыр апэрэ лъэбэкъу, шъолъырхэм ябюджетхэм къазэрэдэхэмы­лъытагъэм къыхэкIэу IэпыIэгъу псынкIэхэм имашинэхэр ащэфынхэ алъэкIырэп. Ахэм аде­Iэгъэн фае, — къыIуагъ В. Во­лодиным

Урысые Федерацием и Къэралыгъо Думэ и Тхьаматэ къы­зэрэхигъэщыгъэмкIэ, шъолъыр­хэм IэпыIэгъу афэхъунхэм фэшI Бюджет кодексым зэхъокIы­ныгъэхэр фашIыгъэх, ащ ыпкъ къикIыкIэ сомэ миллиард 78-рэ ахэм къафагъэнэжьын ылъэ­кIыщт. Бюджет кредитэу ателъхэр зэратыжьынэу щытыгъэ ахъщэхэр ары къафагъэнэ­жьырэр.

«Ащ фэдэ зекIуакIэм ишIо­гъэшхо къэкIонэу щыт, шъо­лъыр­хэр коронавирусым ебэнын­хэмкIэ амалэу яIэр нахьыбэ хъущт, бизнес гурытымрэ ыкIи цIыкIумрэ къакIэIэшъущтых», — къыкIигъэтхъыгъ УФ-м и Къэралыгъо Думэ и Тхьаматэ.

Ащ дакIоу В. Володиным къыIуагъ маскэхэмрэ дезинфекцие зэрашIырэ уцхэмрэ икъоу щыIэнхэм Iоф дашIэныр япшъэ­рылъхэм зэращыщыр.

«ЧIыпIэ зэжъоу тызэрытыр къызыдэплъытэкIэ, грант IэпыIэгъоу бизнес гурытымрэ ыкIи цIыкIумрэ яттырэмкIэ маскэхэм якъыдэгъэкIын нахьыбэ тшIын тлъэкIыщт, ахэр гъотыгъуае хъу­гъэхэшъ»,— къыхигъэщыгъ ащ.

Лъэпкъ проектэу «Предприни­мательствэ гурытымрэ цIыкIум­рэ ыкIи унэе сатыушIэхэм IэпыIэгъу афэгъугъэным» зыфиIо­рэр зыгъэцэкIэрэ УФ-м экономикэ хэхъоныгъэмкIэ и Министерствэ а Iофыр ыпшъэ рилъхьажьымэ ишIуагъэ къэ­кIощтэу Вячеслав Володиным елъытэ.