Мэлылъфэгъум и 6-м къыщегъэжьагъэу финанс фэIо-фашIэхэр зы­гъэ­цэкIэрэ организациеу «Россельхозбанкым» икъутамэхэу шъо­лъыр­­хэм ащыIэхэм хэушъхьафыкIыгъэ графикым тетэу яIофшIэн агъэпсыгъ.

ЩыIэныгъэм къыгъэуцурэ Iофыгъо шъхьаIэхэр зэшIуахынхэмкIэ Iудзыгъэ шIыкIэм тетэу цIыфхэм банкым зыфагъэзэн алъэкIыщт. Унэе ыкIи юриди­ческэ лицэхэм агъэцэкIэрэ фэIо-фашIэхэм ыпкIэ атын ыкIи алъытэн, ахъщэу ралъхьагъэм лъыплъэнхэ, кредитнэ карточкэхэр къызэIуахын ыкIи чIыфэ къырахын, мэкъумэщым хэ­хъоныгъэ ышIыным фэIорышIэ къэралыгъо программэхэм ахэ­лэжьэнхэ алъэкIыщт.

«Россельхозбанкым» Iоф щызышIэхэрэм ыкIи мыщ къа­кIорэ цIыфхэм япсауныгъэ ашIолъапIэу санитарнэ-эпиде­миологие Iофтхьабзэхэр отделениехэм ащызэрахьагъэх, гъу­нэпкъэ шапхъэхэр ащагъэцакIэх. КъакIохэрэм япчъагъэ агъэмэкIэным фэшI Iудзыгъэ шIыкIэм тетэу Iоф адашIэ.

Мэлылъфэгъум и 6-м къы­щегъэжьагъэу фэIо-фашIэу агъэцэкIэщтым елъытыгъэу график гъэнэфагъэ агъэпсыгъ, ар шъолъыр пэпчъ щызэфэ­шъ-хьафышъ, сайтым уихьанышъ, уеплъын фае. Потребительскэ ыкIи иппотечнэ кредитхэр, кредитнэ карточкэхэмкIэ чIыфэр зытыжьыхэрэм зытетыгъэм те­тэу фэIо-фашIэр афагъэцэкIэщт. Ахъщэ илъхьаныр къы­зэIухы­гъэныр е зэфэшIыжьы­гъэныр, хэгъэхъогъэныр, те­хъуагъэр къипхыныр интернет амалхэмкIэ жъугъэцэкIэн шъу­лъэкIыщт.

ЦIыфыр къызхиубытэрэ купым елъытыгъэу телъ ахъщэ чIыфэр ытыжьыныр псынкIэ къыфэхъуным пае икIэрыкIэу къыфалъытэжьыщт. Ахэм ахэ­хьэх: коронавирусым ыгъэсы­мэджэгъэ ыкIи карантиным щысхэр; процент 30-м е нахьыбэу зихахъо къыщыкIагъэхэр; унэм исынхэ фаеу зэрэхъугъэм къыхэкIыкIэ чIыфэр апщыны­жьыныр охътэ гъэнэфагъэкIэ къызэхьылъэкIыхэрэр. Мыхэм къэзыгъэшъыпкъэ­жьырэ тхылъхэр банкым зырахьылIэхэкIэ кредитыр къафалъытэжьыщт.

Мы фэIо-фашIэр Iудзыгъэ шIыкIэм тетэу зэрэпшIыщтыр: банкым иофициальнэ сайтэу www.rshb.ru уихьан, едзыгъоу «Меры поддержки заемщиков-­физических лиц в связи с рас­пространением коронавируса» зыфиIорэр къыхэбгъэщын, къытыридзэрэ бланкым иптхэн фае.

УпчIэу шъуиIэхэр мы телефонхэмкIэ афэжъугъэзэнхэ шъулъэкIыщт: 8 (800) 100-01-00 ыкIи 7787 (МТС, Мегафон, ­Билайн ыкIи Tele2). Шъузэрэтеощтым ыпкIэ хэлъэп. Чэщи мафи Iоф зышIэрэ телефоныр 8(800)100-0-100.

Iэшъынэ Сусан.