Тыгъуасэ Адыгеим и ЛIышъхьэу КъумпIыл Мурат Оперативнэ штабым изэхэсыгъо зэрищагъ. Ар видеоконференцие шIыкIэм тетэу кIуагъэ.

Коронавирусым зимыушъомбгъуным пае ашIэрэ Iофхэм къатегущыIагъ Роспотребнадзорым и ГъэIорышIапIэу АР-м щыIэм ипащэу Сергей Завгороднер. Ащ къызэриIуагъэмкIэ, мэлылъфэгъум и 9-м ехъулIэу а узыр зиIэу зэгуцафэхэрэ нэ­бгырэ 38-рэ къыхагъэщыгъ, нэ­­бгырэ 20 коронавирусыр яIэу агъэунэфыгъ. Сымаджэхэр зы­хэхьагъэ цIыфхэр къыхагъэ­щыгъэх, ахэр нэбгырэ 700 мэхъух, зэкIэхэри карантиным щыIэх, врачхэр алъэплъэх.

Коронавирусыр цIыфым иIэмэ зыщауплъэкIурэ лабораторием иIофшIэн лъегъэкIуатэ. ЗэкIэмкIи республикэм нэбгырэ 5125-рэ щауплъэкIугъ, ахэм ащыщ тест 562-м мы чэщ-зымафэр ары зеплъыгъэхэр. Тест-системэ 7300-рэ джырэ уахътэм Iэ­пэчIэгъанэу яI.

Медучреждениехэм амалэу яIэхэм ахагъэхъоныр, медицинэ Iэмэ-псымакIэхэр ачIагъэуцоныр пшъэрылъ шъхьаIэу Адыгеим и ЛIышъхьэ къыгъэнэфагъ. Мэрэтыкъо Рустем къызэриIуагъэмкIэ, ИВЛ аппаратыкIэхэр рес­публикэм къэсыгъэх, сыма­джэхэр зыдагъэгъолъыщт чIыпIэхэр агъэнэфэгъахэх.

Гъунапкъэ зиIэ шапхъэхэм ягъэцэкIэн зыщыдэлажьэхэрэ уахътэм социальнэ пшъэдэ­кIыжьэу яIэр зэкIэ игъом ыкIи икъоу зэшIохыгъэн зэрэфаем ынаIэ ЛIышъхьэм тыридзагъ. КъумпIыл Мурат АР-м социальнэ хэхъоныгъэмкIэ ыкIи Iоф­шIэнымкIэ иминистрэу Мырзэ Джанбэч пшъэрылъ фишIыгъ сабыйхэр зиунэ исхэу гъот макIэ зиIэхэм ахъщэ тынхэр афашIынхэу. Ащ фэдэ тынхэр унэгъо 10741-мэ аратыщтых, зэкIэмкIи а унагъохэм сабый мин 20 ащапIу. А Iофыгъом пэIухьанэу АР-м ибюджет сомэ миллион 40 къытIупщыщт. А ахъщэ тынхэр зэратыщтхэм документхэр агъэхьазырынхэу щытэп, ахэм афэгъэхьыгъэ къэбарыр Министерствэм Iэ­кIэлъ, ахъщэр занкIэу якарточкэмэ (кIэлэцIыкIу пособиер зыдагъакIощтыгъэм) арагъэ­хьащт.

АР-м и ЛIышъхьэ джащ фэдэу соцучреждениемэ яIофы­шIэхэм афигъэпытагъ МФЦ-мэ яIофшIэн зэтырагъэуцожьынэу, сабый къызыфэхъухэрэр гумэкIыгъохэм ямыолIэнхэм фэшI, ар сыд фэдэрэ IэпыIэгъоу арагъэкIыщтыми фэгъэхьыгъ. Зи пэрыохъу щыIэнэу щытэп.

КIэлэеджакIохэм ягъэшхэн фэгъэхьыгъэу лъэныкъуитIу къы­хахыгъ. АпэрэмкIэ — гъомылапхъэхэр афащэхэзэ ашIыныр, ятIонэрэмкIэ — ащ ычIыпIэкIэ ахъщэ аратыныр. Гъэсэныгъэм­рэ шIэныгъэмрэкIэ министрэу КIэрэщэ Анзаур къызэрэхигъэщыгъэмкIэ, районыбэхэм ащыIэ кIэлэеджакIомэ ащ фэдэ гъомылэпхъэ Iалъмэкъхэр аратыхэу аублагъ.

Экономикэм ылъэныкъокIэ зэхъокIыныгъэхэр зэрэщыIэхэм, тIэкIу-тIэкIоу производствэр зэратIупщыжьыщтыр къыдыхэлъытагъэу, кIэлэцIыкIу IыгъыпIэхэми дежурнэ купхэм яIоф­шIэн ащаублэжьымэ хъунэуи КъумпIыл Мурат ылъытагъ.