ЗэрэзекIощтхэр агъэнэфагъ
Iофыгъоу зытегущыIагъэхэм ащыщ гъэлъэшыгъэ шIыкIэм тет режимым илъэхъан предприятие зырызхэм, бэдзэрхэм, общественнэ транспортым, гъогу ыкIи псэолъэшI организациехэм, псэупIэ-коммунальнэ хъызмэтым яIофшIэн рагъэжьэжьынымкIэ амалэу щыIэхэр гъэнэфэгъэнхэр.
Коронавирусым пэшIуекIогъэнымкIэ унашъоу ашIыгъэхэр гъэцэкIэгъэнхэм мэхьанэшхо зэриIэр Адыгеим и ЛIышъхьэ хигъэунэфыкIыгъ. Ащ дакIоу, экономикэр егъэжьэжьыгъэным фэшI лъэбэкъу гъэнэфагъэхэр шIыгъэнхэ зэрэфаер зэхэсыгъом хэлажьэхэрэм къариIуагъ.
— Республикэм эпидемием ылъэныкъокIэ изытет къызэрыкIоп, ау ащ пэшIуекIогъэным фытегъэпсыхьэгъэ унашъоу тшIыгъэхэм яшIуагъэ къэкIо. Ащ къыхэкIэу ахэм ащыщхэр тIэкIу-тIэкIоу тетхыжьынхэм иIофыгъо непэ тытегущыIэн тэлъэкIы. Хабзэм икъулыкъухэм мыщ екIолIэкIэ гъэнэфагъэ къыфагъотыным, унэшъо тэрэзхэр ашIынхэм мэхьанэшхо иI, — къыIуагъ КъумпIыл Мурат.
Коронавирусым ыпкъ къикIыкIэ анахь чIэнагъэ зышIыгъэ отраслэхэу УФ-м и Правительствэ ыгъэнэфагъэхэм къыпкъырыкIыхэзэ, оперативнэ штабым изэхэсыгъо унашъо щаштагъ экономикэм илъэныкъо хэхыгъэхэм яIофшIэн рагъэжьэжьын алъэкIынэу. Санитар-эпидемиологие шапхъэхэр зэрагъэцакIэхэрэм гъунэ лъызыфыщт ыкIи пшъэдэкIыжь зыхьыщт цIыфхэр объект пэпчъ ащагъэнэфэщтых.
Таксир ыкIи общественнэ транспортыр къызэрекIокIыщтхэм санитар шэпхъэ тедзэхэр пылъыщтых. Межмуниципальнэ маршрутхэм ащыщхэм яIофшIэн рагъэжьэжьыщт. Ау цIыфхэр зезыщэрэ автобусхэм яIофшIэн гъэкIэкIыгъэ режимым тетыщт: пчэдыжьым (сыхьатыр 6-30-м щегъэжьагъэу 10-30-м нэс), пчыхьэм (17-00-м щыублагъэу 20-00-м нэс). Мыщ маршрути 5 къыхеубытэ: Мыекъуапэ — Тульскэр, Мыекъуапэ — Хьаджыкъу, Мыекъуапэ — Кужорскэр, Мыекъуапэ — Табачнэр, Мыекъуапэ — Джаджэр.
Джащ фэдэу санитар шапхъэхэм адиштэхэ хъумэ, мэкъумэщ бэдзэрхэм гъомылапхъэхэр зыщащэрэ чIыпIэхэр мэлылъфэгъум и 13-м къызэIуахыжьынхэ гухэлъ щыI.
— КъыдэзыгъэкIыхэрэм япродукцие IуагъэкIын, ащ ыуасэ ыгъэразэхэу щэфакIохэм къызIэкIагъэхьан алъэкIыным мэхьанэшхо иI. Мыщ дэжьым къыхэзгъэщымэ сшIоигъу зиIофшIэн езгъэжьэжьын зылъэкIыщтхэр Роспотребнадзорым ишапхъэхэм адиштэрэ предприятиехэр ыкIи организациехэр арых, — къыIуагъ республикэм ипащэ.