Социальнэ лъэныкъор анахь къыхэгъэщыгъ
Урысые Федерацием и Конституцие гъэтэрэзыжьынхэр фэшIыгъэнхэм УФ-м и Президентэу Владимир Путиныр кIэщакIо фэхъугъ. Илъэсэу тызыхэтым ищылэ мазэ Федеральнэ ЗэIукIэм фэгъэзэгъэ Джэпсалъэу къышIыгъэм ар къыщиIогъагъ, бгъэтэрэзыжьын фаеу ылъытэхэрэр къыщыхигъэщыгъэх.
Нэужым, гъэтхапэм и 11-м, Закон шъхьаIэм гъэтэрэзыжьынхэр фэшIыгъэнхэм фэгъэхьыгъэ хэбзэгъэуцугъэр Урысые Федерацием и Къэралыгъо Думэ ящэнэрэ еджэгъумкIэ ыштагъ, ФедерациехэмкIэ Советыми ащ къыдыригъэштагъ. Гъэтхапэм и 14-м Президентыр тхылъым кIэтхагъ.
Конституцием гъэтэрэзыжьын 400 фэдиз фэхъугъ. Лъэныкъо зэфэшъхьафыбэхэм ахэр афэгъэхьыгъэх. ЦIыфхэр социальнэу ухъумэгъэнхэр анахьыбэу зигугъу къыщышIыгъэхэм ащыщ. ГущыIэм пае, лэжьэпкIэ анахь макIэр цIыфыр зэрэпсэун ылъэкIыщт ахъщэ анахь макIэу УФ-м щыгъэнэфагъэм къыщыкIэ мыхъущтэу, пенсиехэр, социальнэ ахъщэ тынхэр илъэсым зэгъогогъум нахь мымакIэу индексацие шIыгъэнхэу къыщеIо. КIэлэцIыкIоу лъыплъэн имыIэу къэнагъэхэм яфэIо-фашIэхэм ягъэцэкIэнкIэ къэралыгъом пшъэрылъэу иIэщтхэри щыгъэнэфагъэх.
Тарихъым, бзэхэм, унагъом, гъунапкъэхэм, хэбзэ органхэм япшъэрылъхэм, фитыныгъэхэм, нэмыкIыбэхэм афэгъэхьыгъэ гъэтэрэзыжьынхэр Закон шъхьаIэм фэхъугъэх. Урысыем щыпсэухэрэм амакъэхэр зыфатыхэкIэ ахэм кIуачIэ яIэ хъущт. Мэлылъфэгъу мазэм и 22-м ар зэхэщэгъэнэу нахьыпэкIэ агъэнэфэгъагъ, ау, гухэкIыми, зэпахырэ узэу «Коронавирус Covid-19»-м щыIэныгъэм зэхъокIыныгъэу къыхилъхьагъэхэм ари ахэфагъ.
Вирусым къэралыгъом зыщимыушьомбгъуным пае УФ-м и Президент унэшъо зэфэшъхьафэу ышIыгъэхэм ащыщэу цIыфхэм амакъэхэр зыщатыщтхэ мафэр лъигъэкIотагъ.
Непэ къэшIэгъуай зэпахырэ узым кьыздихьыщтыр, Iофхэр зэрэхъущтхэр. Ащ фэд, тымакъэхэр зыщыттыщтхэ мафэу икIэрыкIэу агъэнэфэжьыщтыри зыми ышIэрэп. Ау а мафэр тапэ зэрилъыр теубытагъэ хэлъэу къэтIон тлъэкIыщт.
Тикъэралыгъо итарихъ зытетым тетэу лIэужхэм зэIэпахыным, зыпарэми зэримыхъокIыным, гъунапкъэхэр, чIыпIэхэр къызэтегъэнэжьыгъэнхэм, унагъор, кIэлэцIыкIур, социальнэу цIыфхэр ухъумэгъэнхэр сыдигъокIи апшъэрэхэм ащыщынхэм тымакъэ афэттыныр зэкIэми зэрэтипшъэрылъыри гъэнэфагъэ.
ХЪУТ Нэфсэт.