Коронавирусым тикъэралыгъо зыщимыушъомбгъуным пае УФ-м и Президент унашъоу къышIыгъэхэм ащыщ бизнесым пылъхэм Iоф­шIэпIэ чIыпIэ зэратыгъэхэм дэсыгъо мазэм лэжьапкIэхэр аIакIагъэ­хьанхэм фэшI, банкхэм процент зимыIэ чIыфэхэр къаратынхэр. Ар къэралыгъо программэу вирусым пэшIуекIогъэным фытегъэпсыхьагъэм къыщыда­лъытагъ.

УФ-м и Правительствэ ипащэ игуадзэу Андрей Белоусовым мы IэпыIэгъур агъэпсынкIэнэу афигъэпытагъ. Вирусым ана­хьыбэу иягъэ зэригъэкIы­гъэхэр ары ащ къыхиубы­тэщтхэр.

Мыщ пэIуагъэхьанэу Гупчэ банкым сомэ миллиарди 150-рэ къытIупщыгъ. Ар «Сбербанкым», «ВТБ-м», «МСП-банкым», «Пром­связьбанкым», «Газ­промбанкым», «Альфа-­бан­кым» ыкIи «Открытие» зыфи­Iорэм атырагощагъ. Мэлылъ­фэгъум и 8-м къыщыублагъэу ахэм кредитхэр предприни­мательхэм аратынхэу рагъэ­жьагъ. Сбербанкымрэ ВТБ-мрэ блэкIыгъэ тхьамафэм къыще­гъэжьагъ процент зимыIэ чIы­фэхэр затыхэрэр.

Мы уахътэм субсидие зыфатIупщыщт банкхэри УФ-м экономикэ хэхъоныгъэмкIэ и Министерствэ къыхехых. Правительствэм субсидиехэр зэрафэкIощт шапхъэхэр нахьыпэкIэ къыгъэнэфагъэх.

Экономикэ хэхъоныгъэмкIэ Министерствэм мыщ сомэ миллиарди 2-рэ миллион 600-рэ пэIуигъэхьан гухэлъ иI. Ащ ипащэу Максим Решетниковым къызэриIуагъэмкIэ, ахъщэр IэпэчIэгъэнэ фондым къыха- хыгъ.

Предпринимательхэм нэбгырэ пчъагъэу IофшIэпIэ чIыпIэ зэрагъэгъотыгъэр, лэжьэпкIэ анахь макIэу атырэр зыфэдизыр къыдалъытэзэ, кредитэу аратыщтыр агъэнэфэщт. Биз­несым иобъектхэм Iоф ащызышIэу ащ нэбгырэ миллионрэ мин 500-рэ фэдиз къыхиубы­тэщтэу, ахэм аратыщтыр сомэ миллиарди 130-м нэсыщтэу пэ­шIорыгъэшъэу къалъытагъ.

(Тикорр.).