Теуцожь районым иадминистрацие ипащэу Хьачмамыкъо Азэмат мы мафэхэм чэщи, мафи имыIэу зыпылъыр иIофшIэгъухэр, чIыпIэ койхэм япащэхэр зыфиузэнкIыхэрэр коронавирусым пэшIуекIонхэр ары. Ащ фэшI оперативнэ штабым план гъэнэфагъэм тетэу Iоф ешIэ.

Непэ къоджэ урамхэр нэкIых, цIыфхэр яунэхэм арысых. Илъэс 65-м зыныбжь къе­хъугъэхэм яспискэхэр чIыпIэ койхэм ащатхыгъэх, сыма­джэ­хэр, зизакъохэр, сэкъатныгъэ зиIэхэр, кIэлабэ зэрысхэр агъэу­нэфыгъэхэу, ахэр зыфэныкъохэр зэрагъашIэх, ящыкIэгъэ гъомылапхъэхэр, Iэзэгъу уцхэр, нэмыкIэу къараIохэрэр волонтерхэм афарагъащэх.

Коронавирусым зимыушъомбгъуным фэшI Iофыгъо зэфэ­шъхьафыбэ районым щызэра­хьэх. ЗэкIэмэ ацIэ къеIогъуай.

Анахь шъхьаIэхэм ащыщ «Дор­транссервисым» ипащэу Хьабэхъу Аскэр иавтомашинитIумэ вирусыр зыгъэкIодыщт уц зэхэшIагъэр гъогухэм атеутхэгъэным фытыригъэпсыхьагъэу етIупщыгъэу Iоф зэрашIэрэр.

— А автомашинэхэм график гъэнэфагъэм тетэу Iоф ашIэ, — къытиIуагъ район администрацием ипащэ иапэрэ гуадзэу Зэрамыку Салбый. — Ахэм тIогъогогъо районым икъоджэ пстэухэм асфальт зытелъхэ ыкIи мыжъо гъогушхоу яIэхэм щэнаут зыхэлъ уц зэхэшIыхьагъэхэр атыраутхагъэх. Хьач­мамыкъо Азэмат мы Iофым лъэшэу ынаIэ тет ыкIи къытфигъэпытагъ джыри ар лъыд­гъэкIотэнэу.

Тэри мыщ пыдзагъэу анахь дэгъоу IофшIэнхэр зыщызэхэщагъэу зигугъу къытфашIыгъэ пащэхэм ащыщхэр гущыIэгъу къызфэдгъэхъугъэх. Джэджэ­хьэблэ чIыпIэ коим чылэгъуиплI хахьэ — ежь Джэджэхьабл, Къунчыкъохьабл, Тэуехьабл, Городскоир. ЧIыпIэ коим ипащэу Уджыхъу Алый къызэ­рэтиIуагъэмкIэ, псэупIи 4-мэ унэгъо 547-рэ адэс, нэбгырэ 1800-рэ фэдиз ащэпсэу.

ЦIыфхэр яунэхэм арысых. Шапхъэр зыукъорэ къахэкIымэ, фагъэгъурэп. ЧылэгъуиплIыри къогъум къосых. Ащыщ го­рэми аптекэ дэтэп. Ащ фэшI псэупIэхэм илъэс 65-м къехъоу зыныбжьхэр, сэкъатныгъэ зи­Iэхэр, унэгъо Iужъухэр, зиза­къохэу IэпыIэгъу зищыкIагъэхэр учет ашIыгъэх. КъызыкIэ­упчIэхэу зыфэныкъохэр афа­гъэцакIэх.

Уджыхъу Алый къызэриIуа­гъэмкIэ, мы социальнэ Iофы­гъохэм афэгъэзагъэр игуадзэу Нэхэе Адам ары. Ащ Iэзэгъу уц зищыкIагъэхэр зэрегъашIэхэшъ, къафарегъащэ. Джащ фэ­дэу, гъомылэпхъэ Iофым ылъэ­ны­къокIи хэти гумэкIыгъо хагъэ­тырэп. Шъоущыгъу килограмми 10 зырыз нэбгырэ 11-у чIыпIэ къин итхэм аратыгъэх. Илъэс 65-м ехъу зыныбжьхэм, зиза­къоу псэухэрэм ыкIи сымаджэхэ нэ­бгыри 141-мэ гъомылэпхъэ Iахь­хэр афахьыгъэх, кIэлабэ зиIэ унэгъуипшI ахэм ахэфагъ.

— Асфальт зытелъ гъогу километрэ 20 фэдиз хъурэм тирайон ипащэу Хьачмамыкъо Азэмат ыпкъ къикIыкIэ тIогъогогъо вирусыр зыгъэкIодыщт уц зэхэшIыхьагъэр атыраутхагъ, ащкIэ къоджэдэсхэр фэразэх.

Адыгеим и ЛIышъхьэу КъумпIыл Мурат тицIыфхэр коро­навирусым щыухъумэгъэнхэм зэрилъэкIэу Iоф зэрэди­шIэрэр зэхатшIэзэ, тэри ар къызэрэтщыгугъырэр къэдгъэшъыпкъэжьыным тыпылъ. Тиво­лонтерхэр тиIэпыIэгъушIух. Анахь чанхэм, къоджэдэсхэр лъэшэу зыгъэразэхэрэм ащыщых Бэрзэдж Светэ, Къуекъо Асыет, Нэныжъ Сусанэ, Ты­гъужъ Мариет, Теуцожь Юлэ, нэмыкIхэри. Мы Iофыгъоу ыпшъэкIэ зигугъу къэтшIыгъэхэр, спискэхэр зэкIэ зэхэзгъэу­цорэр, зэзгъафэрэр тичIыпIэ кой испециалист шъхьаIэу Къуижъ Зар ары, — еIо А. Уджыхъум.

Аскъэлэе чIыпIэ коим ипащэу ГъукIэлI Рэщыди коро­навирусым ебэныгъэнымкIэ Iофыгъоу зэрахьэхэрэр къед­гъэIотагъ. КъызэрэтиIуагъэмкIэ, чIыпIэ коим чылэгъуитIу хэхьэ — Аскъэлаерэ Краснэмрэ. Узым зыщыухъумэгъэнымкIэ шапхъэу щыIэр зэкIэ цIыфхэм агъэцакIэ. Яунэхэм арысых, тиурамхэр зэгъокIых, цIыфзэхахьэхэр щыIэхэп. Къоджэдэсхэм къагурэIо гъогум утеты зэрэмы­хъущтыр.

Аскъэлае — унэгъо 425-рэ, Краснэм — унэгъуи 111-рэ адэс. IэпыIэгъу зищыкIагъэу, гъомылэпхъэ Iахьхэр зыфэ­шIыгъэн фаеу атхыгъэр нэбгыри 191-рэ.

— Ахэм непэ гъомылэпхъэ Iахьхэр афагощыгъ, — къытиIуагъ Р. ГъукIэлIым. — Ащ ыпэкIэ унэгъо 14-мэ шъоущыгъу килограмм пшIырыпшI аратыгъ. ТипсэупIэхэм адэсхэ социальнэ фэIо-фашIэхэр зыфа­гъэцэкIэрэ нэбгырэ 82-м афэгъэзагъэхэр нэбгыри 10 мэхъух, ахэм япащэр Тэмыкъое Фатим. Къэбзэныгъэм ылъэныкъокIи, Iэзэгъу уцхэмкIи ящыкIагъэр арагъэгъоты. Тиволонтерхэми алъэкI къагъанэрэп. Джа зигугъу къэтшIыгъэ тина­хьыжъхэм, сэкъатныгъэ зиIэхэм, кIэлабэ зиIэхэу яунэхэм арысхэм ящыкIагъэхэр зэра­гъашIэх, IэпыIэгъу афэхъух. Тигъогухэми щэнаут зыхэлъ уцхэри тIогъогогъо атыраутхагъэх. АскъэлаекIэ урамхэу Лениным ыкIи Хъ. Андырхъуаем ацIэ зыхьыхэрэм, Краснэм иурамэу асфальт зытелъхэм. А IофшIэныр лъагъэкIотэщт.

Нэхэе Рэмэзан.