Унэм тижъугъэсых
Хъымыщ Казбек, АР-м инахьыжъхэм я Совет хэт, общественнэ IофшIакIу:
— Непэ зэрэдунаеу гумэкIыгъо хэфагъ. Ащ Iэзэгъу къыфэбгъотын фае. Сэ сенэгуе медицинэ сообществэм, Роспотребнадзорым, хэушъхьафыкIыгъэ ушэтын институтхэм уз щынагъом иIэзэгъу къыфагъотынэу. ЦIыфхэр бэлахь Iаджми къялыгъ. Хэгъэгум япащэхэм унашъоу ашIыхэрэм, аштэхэрэм адесэгъаштэ, шIокI имыIэу ахэр дгъэцэкIэнхэ фае. КъыдгурыIон фае псауныгъэ, узынчъагъэ тиIэныр, тибынхэр ухъумагъэ хъуныр зыIэ илъыр тэры, тызэрэзекIорэр ары. ЦIыфым нахь лъапIэ дунаим тетэп, ар къэухъумэгъэныр пстэумэ апшъ. Ар икъукIэ зэхатшIэу зыкъэтыухъумэжьын фае. Сэ къуаджэм сыкIуагъэу сыдэс, сибынхэр, сикъорэлъф-пхъорэлъфхэр къысфэсакъых.
КIАРЭ Фатим.
***
Зезэрэхьэ Аслъан, Шэуджэн район, мэкъумэщ-фермер хъызмэтшIапIэм ипащ.— Шъыпкъэу пIощтмэ, мы мафэхэм урамхэм Iоф ямыIэу къатехьэхэрэм сыгу ябгъэ. Анахьэу нэжъ-Iужъхэр ары. ЗиIофшIэн зэпызымыгъэугъэхэм амал яIэп, Iоф гъэнэфагъэ зиIэу къыдэкIыгъэхэри ары, ау зыпари гумэкIыгъо уимыIэмэ унэм сыд пай уимысыщт. Коронавирусыр щынагъоу щымытыгъэмэ зэрэдунаеу ыгъэгумэкIыныя. Ар къагурыIон фай зэкIэми.
Гъэтхэ IофшIэнхэр ежьагъэх, лэжьыгъэр чIыгум едгъэкIун фае, ащ бэкIэ неущырэ мафэр епхыгъ.
Ащ фэшI Iоф тэшIэ. Ау тракторхэм акIоцI инфекциер, вирусыр зыукIырэ веществохэмкIэ тэгъэкъабзэ, ахэм арылажьэхэрэм маскэхэр, аIэхэр зэратхьакIыщтхэр ятэтых, благъэу зэмыкIолIэнхэм лъэшэу тынаIэ тет. Сыхьатитф нахьыбэри Iоф ядгъашIэрэп. Ащ тетэу зэкIэри зекIон фаеуи сэлъытэ.
Амал зиIэр иунэ исын фае. ТызэгурыIоу тызэдеIэжьмэ коронавирусым тыпэшIуекIощт. Ар зэпыоу кIодыжьмэ, джы къины-гъоу тиIэхэри текIыщтых.
ЗэкIэми Тхьам псауныгъэ къарет!
ХЪУТ Нэфсэт.