Зэпахырэ узэу «Коронавирус Covid-19»-м тикъэралыгъо зыщимыушъомбгъуным пае УФ-м и Президент унашъоу ышIыгъэхэр гъэцэкIэгъэнхэм фэшI УФ-м и Правительствэрэ Сбербанкымрэ вирусым иягъэ зэригъэкIыгъэхэм IэпыIэгъу ятыгъэным фытегъэпсыхьэгъэ къэралыгъо программэхэр атIупщыгъэх.

ГущыIэм пае, ахэм къады­хэлъытагъэу бизнес цIыкIум, иным ыкIи гурытым апылъхэм IэпыIэгъу аратыщт. Банкым чIыфэ къыIызыхыгъэу «Covid- 19»-м иягъэ зэригъэкIыгъэхэм ар икIэрыкIэу къафалъытэ­жьыщт (реструктуризация). Ащ фэдэ IэпыIэгъур транспортым игъэзекIон, сатыушIыным, культурнэ Iофтхьэбзэ зэфэшъхьафхэм язэхэщэн апылъхэм, хьакIэщ, салон, шхапIэ, спортым ыкIи физкультурэм япхыгъэ клуб къызэIузыхыгъэхэм, нэмыкIыбэхэм агъотыщт.

Банкым къызэритыгъэмкIэ, бизнес цIыкIум пылъэу чIыфэ зэратыгъэхэм ащ икъэтыжьын мэзих пIалъэкIэ афызэкIа- хьащт.

Бизнес цIыкIум пылъхэм Iоф­шIэпIэ чIыпIэ зэратыгъэхэм мы дэсыгъо мазэм лэжьапкIэхэр аIакIагъэхьашъунхэм пае процентхэр темыгъэхъуагъэхэу банкхэм чIыфэхэр къаратынхэу къэралыгъом ипащэ унашъо ышIыгъ. Ащ фытегъэпсыхьэгъэ программэм къыдыхэлъытагъэу Сбербанкым кредит фаехэм лъэIу тхылъхэр аIихынхэу ри­гъэ­жьагъ. Ар ильэс пIалъэкIэ аритыщт, апэрэ мэзихым зыпари процент техъощтэп, нэужым проценти 4 афытыра­дзэщтыр.

Коронавирусым иягъэ зэригъэкIыгъэ предпринимательхэм апае мыхэм анэмыкI фэгъэ­кIотэнхэми ежь Сбербанкыр кIэщакIо афэхъугъ. КъызэритыгъэмкIэ, зэпстэури «линие плъырэу» къызэIуихыгъэм утеомэ къыщыуаIощт. Телефоныр: 8.800-200-34-40.

Бизнесым пымылъэу, ау чIыфэ къаIызыхыгъэхэм апае IэпыIэгъухэри къэралыгъо программэхэм къащыдэлъытагъэх. ГущыIэм пае, ипотекэ зыгъэпсыгъэу е нэмыкI кредит зышта­гъэу, коронавирусым иягъэ зэригъэ­кIыгъэхэм чIыфэм итыжьын мэзих пIалъэкIэ афызэкIихьащт. Ащ къыхиубытэхэрэр зэпахырэ узыр къызэолIагъэхэр, IэкIыбым къызэрикIыжьыгъэм фэшI карантиным щыIагъэхэр, дэсыгъо мазэм лэжьапкIэ къызэрамытыгъэхэр, IофшIэпIэ чIыпIэр чIэзынагъэхэр ары. ЦIыфым кредитыр зэритыщтыр фызэкIахьаным пае ащ ушъхьа­гъоу фэхъугъэр къэзыушыхьатырэ тхылъхэр къыхьынхэ фае.

Сбербанкым къызэритырэмкIэ, УФ-м и Къэралыгъо Думэ мыщ фэгъэхьыгъэ законыр зиштагъэм къыщыублагъэу цIыфхэм жъугъэу лъэIу тхылъхэр къатых. Ау законым кIуачIэ джыри иIэ хъугъэп, УФ-м и Президенти кIэтхагъэп. Ащ фэшI, мы хэбзэгъэуцугъэм къы­хиубытэу банкыр тхылъхэм ахэплъэн джыри фитэп.

Коронавирусым псынкIэу зызэриушъомбгъурэм къыхэкIыкIэ, IэкIыб къэралыгъуабэхэм ягъунапкъэхэр зэфашIыгъэхэу, Урысыем икIыгъэу ахэм ащы­Iэхэр къызэпырыкIыжьышъу­хэрэп. Ахэми Сбербанкыр адеIэ. УФ-м и Правительствэ ипащэ илъэIукIэ ахъщэ къытIупщыгъ ыкIи шIушIэ фондэу «Память поколений» зыфиIорэм ар нэбгырэ 400-м ехьумэ аIэкIигъэ­хьагъ. Мы IэпыIэгъур джыри лъагъэкIуатэ, сыда пIомэ IэкIыбым къикIыжьын фаер бэ.

ХЪУТ Нэфсэт.