Гъот макIэ зиIэ унагъохэм арыс кIэлэцIыкIухэм ахъщэ IэпыIэгъу аратыщт
Партиеу «Единэ Россиемрэ» Урысыем и Правительствэрэ илъэси 3-м къыщегъэжьагъэу илъэси 7-м нэс зыныбжь кIэлэцIыкIухэр зэрыс унагъохэу гъот макIэ зиIэхэм мазэ къэс ахъщэ IэпыIэгъу зэраратыщт правовой амалхэр къагъотыгъэх.
Партиеу «Единэ Россием» и Генеральнэ совет исекретарэу Андрей Турчак Урысые Федерацием IофшIэнымкIэ ыкIи социальнэ политикэмкIэ иминистрэу Антон Котяковым дыриIэгъэ онлайн-зэIукIэгъум ащ щытегущыIагъэх. Адыгеим и Къэралыгъо Совет – Хасэм и Тхьаматэ игуадзэу, партиеу «Единэ Россием» и Тхьаматэ ирегион общественнэ приемнэ ипащэу Шъао Аскэри мы Iофтхьабзэм хэлэжьагъ.
Коронавирусым зызыщиушъомбгъурэ лъэхъаным цIыфыбэ, апэрэ чэзыоу кIэлэцIыкIухэр зэрыс унагъохэр, социальнэу ухъумэгъэнхэ зэрэфаер мыщ щыхагъэунэфыкIыгъ.
Урысыем и Президентэу Владимир Путиным и Джэпсалъэ IэпыIэгъу лъэпкъыкIэхэр къыщигъэнэфагъэх. Илъэси 3-м къыщегъэжьагъэу илъэси 7-м нэс зыныбжь кIэлэцIыкIухэр зэрыс унагъохэм мазэкIэ нахь пасэу – мы илъэсым имэкъуогъу къыщегъэжьагъэу ащ фэдэ ахъщэ IэпыIэгъу аратэу рагъэжьэнэу ащ пшъэрылъ афишIыгъ.
«Ащ фэдэ ахъщэ IэпыIэгъур къаратынымкIэ федеральнэ законхэу, Правительствэм иунашъохэу ищыкIагъэхэр хьазырых. Iофыр къызыфанэрэр шъолъыр хэбзэ Iэшъхьэтетхэр ары», – къыIуагъ Андрей Турчак.
«Урысые Федерацием ишъолъырхэу апэу мыщ фэдэ Iофыгъохэр зэшIозыхыгъэхэм Адыгеир зэу ащыщ. Партием и Генеральнэ совет исекретарь селекторнэ зэIукIэгъоу щыIагъэм ар щыхигъэунэфыкIыгъ. Адыгеим и Къэралыгъо Совет – Хасэм зэхэсыгъоу гъэтхапэм и 23-м иIагъэм депутатхэм законэу «Илъэси 3-м къыщегъэжьагъэу илъэси 7-м нэс зыныбжь кIэлэцIыкIухэм мазэ къэс ахъщэ IэпыIэгъу ятыгъэным ехьылIагъ» зыфиIорэр щаштагъ. Ащ фэдэ IэпыIэгъу аIукIэным пае республикэ бюджетым ищыкIэгъэ зэхъокIыныгъэхэр фашIыгъэх. Ахъщэ IэпыIэгъур зэратыщтыр ным е тым язэу, кIэлэцIыкIум илIыкIоу ренэу е нахьыбэрэмкIэ кIэлэцIыкIум игъусэу Адыгеим щыпсэурэр ары. Мыщ дэжьым къэIогъэн фае ащ фэдэ унагъом хахъоу иIэр урыпсэунымкIэ республикэм щагъэнэфэгъэ ахъщэм зэрэнахь мэкIэн фаер. Социальнэ къулыкъухэм яIофшIэн къафэгъэпсынкIэгъэным фэшI электрон документхэр ары аIэкIагъэхьанхэ фаер, – къыIуагъ Шъао Аскэр. – Партиеу «Единэ Россием» ифракцие идепутатхэм афэлъэкIырэр зэкIэ ашIэщт зигугъу къэтшIыгъэ ахъщэ IэпыIэгъур аIэкIэхьанымкIэ. Ащ нэмыкIэу «Единэ Россием» хэтхэм ахъщэр икъоу унагъохэм аIукIэнхэм пае законопроектыр зэрагъэцакIэрэм гъунэ лъафыщт».