КIэлэеджэкIо 6036-мэ аIукIэщт
Iудзыгъэ шIыкIэм тетэу зэрэрагъэджэщтхэм къыхэкIэу, фэгъэкIотэныгъэ зиIэ купым хэхьэрэ кIэлэеджакIохэу Мыекъуапэ дэсхэм ыпкIэ зыхэмылъ гъомылапхъэхэр атырагощэнхэу рагъажьэ. Илъэс еджэгъум къыкIоцI ыпкIэ хэмылъэу агъэшхэщтыгъэ нэбгырэ 6036-мэ IэпыIэгъур аIукIэщт.
Адыгэ Республикэм и ЛIышъхьэу КъумпIыл Мурат ипшъэрылъкIэ мыщ фэдэ IэпыIэгъур кIэлэеджакIохэм аIукIэщт. МыекъуапэкIэ ащ пэIуагъэхьащт сомэ миллиони 3-м ехъур къэлэ администрацием ипащэ иIэпэчIэгъэнэ фонд къыхахыгъ.
Мы къэбарыр ны-тыхэм алъагъэIэсыщт, Iофтхьабзэр щынэгъончъэу ыкIи псынкIэу зэхэщэгъэным фэшI гъэсэныгъэм иучреждениехэр зэрэзекIощтхэр къафаIотагъ.
Шъугу къэдгъэкIыжьын, коронавирусым зиушъомбгъуным ищанагъо пэшIуекIогъэным пае мэлылъфэгъум и 6-м щегъэжьагъэу Мыекъуапэ дэт еджапIэхэм Iудзыгъэ шIыкIэм тетэу кIэлэеджакIохэр рагъэджэщтых.