МыIофшIэгъу мафэхэу мэлылъфэгъум и 4-м къыщегъэжьагъэу и 30-м нэс алъытагъэхэм Iоф зышIэхэрэм ялэжьапкIэ адрэ къызэрыкIо мафэхэм афэдэу къафалъытэщт.

— МыIофшIэгъу мафэр зыгъэпсэфыгъо е мэфэкI зыгъэпсэфыгъо мафэхэм ахалъытэрэп. Арышъ, а пIалъэм Iоф зышIырэм илэжьапкIэ хэгъэхъуагъэу къыратыщтэп, зытетыгъэм фэдизыщт, — къытыгъ УФ-м IофшIэнымкIэ и Министерствэ.

Джащ фэдэу ведомствэм зэрэщыхагъэунэфыкIыгъэмкIэ, Урысыем щыпсэухэрэм окладкIэ Iоф зышIыхэрэм лэжьапкIэр къазэраратыщтыгъэм фэдэу къаIукIэщт, адрэхэм — Iофэу ашIагъэм телъытагъэу лэжьапкIэр къызэратыхэрэм – IофшIэн языгъэгъотырэм иIэ шэпхъэ актым къызэрэдилъытэрэм елъытыгъэу ахъщэкIэ агъэшIощтых.

Шъугу къэдгъэкIыжьын, Урысые Федерацием и Президентэу Владимр Путиным цIыфхэм афигъэхьыгъэ Джэпсалъэм гъэтхапэм и 30-м къыщегъэжьа­гъэу мэлылъфэгъум и 3-м нэс мыIофшIэгъу мафэхэу зэралъытагъэр къыщиIогъагъ. Джыри а пIалъэр мэлылъфэгъум и 30 нэс лъагъэкIотагъ. Мы Iофтхьабзэр коронавирусым зиушъомбгъуным ищынагъо нахь макIэ шIыгъэным фэIорышIэ.

Iэшъынэ Сусан.