Урысыем иполитикэ партиеу «Единэ Россием» и Тхьаматэу Дмитрий Медведевым селектор зэхэсыгъоу тыгъуасэ зэхищагъэм хэлэжьагъ Адыгеим и ЛIышъхьэу, партием ишъолъыр къутамэ исекретарэу КъумпIыл Мурат.

Зэхэсыгъом Iофыгъо шъхьаIэу къыщаIэтыгъэр коронавирусым ыпкъ къи­кIыкIэ цIыфхэм IэпыIэгъу зэрафэхъунхэ алъэкIыщтыр ыкIи мы IофшIэным волонтер организациехэм чIыпIэу щаубытырэр ары.

Дмитрий Медведевым къызэрэхигъэщыгъэмкIэ, коронавирусым иэпидемие нахь къеIыхыфэкIэ, Iофхэм язытет зыпкъ еуцожьыфэкIэ «Единэ Россиер» цIыфхэм IэпыIэгъу афэхъущт.

— Федеральнэ Ситуационнэ гупчэ дгъэпсыгъэ, мафэ къэс телефонымкIэ нэбгырэ минипшI пчъагъэмэ ащ зыкъы­фагъазэ, джащ фэдэу волонтер мин 80-м ехъумэ яIофшIэн зэхещэ. ЗищыкIагъэхэм, анахьэу зыныбжь хэкIотагъэ­хэм, гъомылапхъэхэр афахьых. Чэщи мафи зимыIэу Iоф зышIэрэ медикхэм яунагъохэм IэпыIэгъу афэхъух, — къы­Iуагъ Дмитрий Медведевым.

Зэпахырэ узым пэшIуекIогъэным фытегъэпсыхьэгъэ Урысые Iофтхьабзэу «ЗэкIэми тызэгъус» зыфиIорэм Адыгеир чанэу хэлажьэ. А IофшIэныр гъэцэкIагъэ зэрэхъурэм лъэплъэ Адыгеим и ЛIышъхьэ.

— Анахьэу тынаIэ зытетхэр непэ щыIэныгъэм чIыпIэ къин ригъэуцогъэ нэжъ-Iужъхэр, сэкъатныгъэ зиIэхэр арых. Мыхэм гъомылапхъэхэр ыкIи унагъом щагъэфедэрэ пкъыгъо шъхьа­Iэхэр аIэкIэтэгъахьэх. ЦIыфхэм социальнэ IэпыIэгъу ягъэгъотыгъэным яIа­хьышIу къыхалъхьэ бизнес-сообществэм, дин ыкIи общественнэ организа­циехэм ялIыкIохэм, гупыкI зиIэ цIыф­хэм, — къыхигъэщыгъ КъумпIыл Мурат.

Адыгеим и ЛIышъхьэ ипресс-къулыкъу.