Мыекъопэ районыр рызэтырагъэпсыхьанэу тызхэт илъэсым сомэ миллион 450-рэ районым къыIэкIэхьащт, федеральнэ ыкIи шъолъыр программэхэм пащэхэр ренэу зэрахэлажьэхэрэм ар къыпэкIэкIуагъ.

2019-рэ илъэсым къэралыгъо программэу «Комплексное развитие сельских территорий» зыфиIорэм зэрэхэлэжьэнхэу агъэхьазырыгъэ проектыр УФ-м мэкъу-мэщымкIэ и Министерствэ къыщагъэшъыпкъэжьыгъ ыкIи къадыригъэштагъ.

Муниципалитетым ипресс- къулыкъу къызэритырэмкIэ, псэупIэхэу Каменномостскэм, Удобнэм, къутырэу Восточные сады, станицэу Курджипскэм культурэм иунэхэу адэтхэм ягъэцэкIэжьын рагъэжьагъ. КIэ­лэцIыкIу IыгъыпIищи агъэкIэ­жьыщт. Ахъщэу къафатIупщы­гъэм кIэлэеджакIохэр еджапIэхэм къазэрэращэлIэщтхэ автобусыкIэхэу 8 къыращэ­- фыщт.

«Современный облик сельских территорий» зыфиIорэ программэм ишIуагъэкIэ Каменномостскэмрэ «Забелая» зыфиIорэ псэупIэмрэ километрэ 33-рэ хъоу газры­кIуапIэхэр, псэупIэу Победэм километри 2 фэдиз ащагъэ­псынэу мэгу­гъэх.

НэмыкI ведомственнэ проектэу «Развитие инженерной инфраструктуры на сельских территориях» зыфиIорэм ихьатыркIэ станицэу Дагестанскэм, поселкэхэу Табачнэм ыкIи Тульскэм ащырагъэжьэгъэ Iофтхьабзэхэр лъагъэкIотэщтых, газрыкIуапIэхэм якъудыин хагъэхъощт.

Джащ фэдэу 2020-рэ илъэсым къыкIоцI проектибгъу зэфэшъхьафхэу агъэцэкIэнхэу апэ илъ. Спортивнэ площадкэхэр, кIэлэцIыкIу джэгупIэхэр псэупIэхэм къадагъэуцощтых, цIыфкIопIэ чIыпIэхэр зэтырагъэпсыхьащтых.

Унэгъо ныбжьыкIэхэу сабыищ е нахьыбэ зиIэхэу унэхэр атырашIыхьанхэу чIыгу Iахьхэр къызэратыгъэхэри агъэгушIощтых. Ахэм апае зэхагъэуцогъэ проектыр ведомственнэ программэу «Развитие жилищного строительства на сельских территориях и повышение уровня благоустройства домовладений» зыфиIорэм щыпхырыкIыгъ. ПсэупIэхэр зыщашIыщтхэ чIыпIэм ищыкIэгъэ инфраструктурэм игъэпсын хабзэм къытIупщырэ мылъкумкIэ агъэпсыщт. Зигугъу къэтшIыгъэ Iофыгъохэм ягъэцэкIэн 2020 — 2022-рэ илъэс­хэм къаухыщт.