ПшъэдэкIыжь рагъэхьыгъ
Нысащэм хэтыгъэ автомобилэу «Мерседес» зыфиIорэм иводитель гъогурыкIоным ишапхъэхэр зэриукъуагъэхэр къизыIотыкIырэ видеотехыгъэр социальнэ сетьхэм къызэрарыхьагъэм къыкIэлъыкIоу Адыгеим и Къэралыгъо автоинспекторхэм уплъэкIунхэр ышIыгъэх.
Полицием зэригъэунэфыгъэмкIэ, 2020-рэ илъэсым гъэтхэпэ мазэм Мыекъуапэ иурамхэу Чкаловымрэ Димитровымрэ зыщызэуалIэхэрэм Мерседесым иводителэу илъэс 25-рэ зыныбжьыр нысащэм хэтэу къызэкIакIозэ нэфрыгъуазэр къызэхэмынагъэу гъогум техьагъ. Ащ къыхэкIэу нэмыкI машинэу гъогум тетыгъэхэм ар пэрыохъу афэхъугъ.
КъызэрэчIагъэщыгъэмкIэ, Мыекъуапэ щыпсэурэ кIалэм апэрэп мыщ фэдэ зекIуакIэхэр къызэрэхафэхэрэр. ЯтIонэрэу хэукъоныгъэ зэришIыгъэм фэшI полицием икъулыкъушIэхэм мыщ епхыгъэ Iофыр хьыкумым фагъэхьыгъ.
Ащ нэмыкIэу автомобилым номер зэрэтемылъыгъэм ыкIи апчыр пленкэ шIуцIэкIэ зэрэзэхэгъэпкIыхьагъэм афэшI гъогурыкIоным ишапхъэхэр зыукъуагъэм административнэ пшъэдэкIыжь тыралъхьагъ.
Адыгеим и Къэралыгъо автоинспекцие икъулыкъушIэхэм цIыфхэм ыкIи водительхэм къяджэх гъогурыкIоным ишапхъэхэр амыукъонхэу, гъогум Iэдэбрэ сакъыныгъэрэ къызщыхагъэфэнэу.