Общественнэ чIыпIэхэм хъункIэн бзэджэшIагъэхэу ащызэ­ра­хьэхэрэм ащыухъумэгъэнхэм фэшI шIэгъэн фаехэм полицием иIофышIэхэм цIыфхэр ащагъэгъуазэх.

Мыщ фэдэ шапхъэхэр зыщышъумыгъэ­гъупшэх:

— ахъщэу шъуIыгъыр зыфэдизыр общественнэ чIыпIэхэм къащышъумыгъэлъагъу;

— пчыхьэр хэкIотагъэу унэм шъукIожьы ­хъумэ, цIыфхэр макIэу зыщызекIохэрэ урамым шъурымыкIомэ нахьышIу;

— унэм шъукъэсыжьы хъумэ (анахьэу шIункIым) зышъуплъыхь, зыгорэ шъуауж итэу, къы­шъулъыплъэу гуцафэ шъу­шIымэ шъусакъ;

— подъезд чIэхьагъум дэжь шъумышIэрэ цIыф куп зэхэт шъуащыIукIэмэ шъуадэмыгущыIэу шъуаблэкI, шъуизакъоу подъездым шъучIэмыхьажьэу шъуиунэ чIэс бысымхэм шъуяжи, ахэм шъуари­гъусэу шъучIэхьажь;

— шъумышIэрэ цIыфым лифтым шъудимытIысхь;

— зыгорэ шъуауж къи­хьагъэу шъуегуцафэмэ, цIыфхэр нахьыбэу зы­дэщыIэхэ чIыпIэхэм (ту­чанхэм, щэпIэ гупчэхэм) шъуачIахь, нэужым псынкIэу полицием иIофы­шIэ­хэм макъэ яжъугъэIу;

— лифтым къыщышъутебэнагъэхэмэ, диспетчерым макъэ зэребгъэIун плъэкIыщт кнопкэм шъутеIункI;

ШъушIэн фае:

— уIэшыгъэу бзэджа­шIэр къышъутебэнагъэмэ шъупэмыуцужь (шъузы­пэуцужьыкIэ бзэджашIэр нахьри къэгубжын ыкIи изекIуакIэхэр ыгъэлъэ­шынхэ ылъэкIыщт);

— бзэджашIэм итеплъэ дэгъоу зэжъугъашIэ;

— бзэджашIэр къызэ­рэшъутебэнагъэм епхыгъэ къэбарыр псынкIэу по­лицием IэкIэжъугъэхьаным фэшI номерэу 02-м шъутеу.

ЦыхьэшIэгъунчъэу щыт пкъыгъохэр къэжъу­гъотыгъэхэмэ шъузэрэзекIонхэ фаехэм полицием иIофы­шIэхэм шъу­щагъэгъуазэ.

Пкъыгъом итеплъэкIэ ар зыфэдэр къэшIэгъуае. Камуфляжым фэдэу Iэлъмэкъыр, къэмланэр, джэгуалъэр агъэфедэх. ЦIыф­хэр бэу зыщызэхахьэхэрэ чIыпIэхэм цыхьэшIэгъунчъэу щыт пкъыгъор къыщыжъугъотыгъэмэ, шъуфэ­сакъ, шъунэмыс, псынкIэу полицием икъулыкъушIэ­хэм макъэ яжъугъэIу.

Общественнэ транспортым хьап-щып горэ къыранагъэу гу лъышъутагъэ­мэ, цIыфэу исхэм шъуя­упчI. Ар къычIэзынагъэр ыкIи къычIэзынэн зылъэ­кIыщтыр зэжъугъашI. Ар зыер жъугъэунэфын шъумылъэкIыгъэмэ, водителым ешъуIу.

Подъезд чIэхьагъум дэжь шъузэгуцафэрэ пкъы­гъор къыщыжъугъотыгъэмэ мыщ щыпсэухэрэм шъуяупчI, бысым горэм къычIинагъэмэ, зэжъу­гъашI. Ар зыер къычIэ­шъумыгъэщыгъэмэ полицием макъэ ежъугъэIу.

Джащ фэдэу IофшIапIэхэм цыхьэшIэгъунчъэу щыт пкъыгъор къащыжъугъотыгъэмэ, псынкIэу ад­министрацием е учреж­дением идежурнэ макъэ яжъугъэIу.

ШъушIэн фаехэр:

— къэжъугъотыгъэ пкъы­гъор къызэтешъумых ыкIи шъумыгъэкощ;

— амал зэриIэу пкъыгъор зыер зэжъугъашI;

— пкъыгъор зыер шъу­мыгъэунэфыгъэмэ, полицием макъэ ежъугъэIу;

— пкъыгъор цыхьэшIэгъунчъэу зэрэщытыр гъу­нэгъоу щыт цIыфхэм яшъуIу;

— пкъыгъор къызщы­жъугъотыгъэ чIыпIэр цIыф­хэм къабгынэнэу яшъуIу;

— полицием икъулыкъу­шIэхэр къэкIофэхэ шъуеж.

Джыри зэ шъугу къэтэгъэкIыжьы!!!

Ны-тыхэр! Шъуисабый­хэм ящыIэныгъэрэ япсау­ныгъэрэ шъоры зыIэ илъыр. Урамым къыща­гъотыгъэ пкъыгъом щынагъо къыздихьын зэри­лъэ­кIыщтыр агурыжъугъаIу.

Сакъыныгъэ къызхагъэ­фэнэу, ащ фэдэ пкъыгъо­хэм защадзыенэу яшъуIу.