Адыгеим псауныгъэр къэухъумэгъэнымкIэ иминистрэу Мэрэтыкъо Рустем къызэриIуагъэмкIэ, респуб­ликэмкIэ коронавирусыр апэдэдэ къызэузыгъэ кIэлэ ныбжьыкIэр хъужьыгъэ. Ащ тIогъогогъо анализхэр рагъэтыжьыгъэх, тIумкIи зэрэхъужьыгъэр гъэунэфыгъэ хъугъэ. Ар къэбар гушIуагъу. Ау пчъагъэхэм къызэрагъэлъагъорэмкIэ, тиреспубликэ щыщхэу узыр къыз­пыхьагъэхэр нахьыбэ хъугъэх.

Роспотребнадзорым и ГъэIорышIапIэу Адыгеим щыIэм мэлылъфэгъум и 6-м къызэритыгъэмкIэ, коронавирусыр иIэу зэгуцэфэхэрэ нэбгырэ 17 агъэунэфыгъ. Узыр зиIэу Москва къыщагъэшъыпкъэжьыгъэр — 14. ЗызэхэбгъахъохэкIэ — 31-рэ.

Коронавирусыр зыщагъэунэфыгъэ чIыпIэхэр: Мые­къуапэ, Мыекъопэ, Тэхъутэмыкъое, Теуцожь районхэр арых.

Сымаджэхэм аныбжь илъэс 20 — 40, зыныбжь имыкъугъэу нэбгыри 3, илъэс 60-м къехъугъэхэри ахэтых.

Зэпахырэ узхэм зыщяIэзэхэрэ сымэджэщэу Мые­къуапэ дэтым ахэр чIэлъых. Зы бзылъфыгъэ реанимацием къыращыжьыгъ, ащ ипсауныгъэ нахь зэтеуцожьыгъ. (Тикорр).