Адыгеим Iэзэгъу уцхэм ыкIи медицинэ оборудованием ащыхэгъэхъогъэным епхыгъэ IофшIэныр лъагъэкIуатэ. Тхьабылхэм Iоф языгъэшIэщт аппарати 104-у щыIэм джыри 15 хагъэхъуагъ, ащ нэмыкIэу пкъыгъо 24-рэ къаIэкIэхьанэу ежэх.

Оперативнэ штабым изэхэсыгъоу щыIагъэм къызэрэщыхагъэщыгъэмкIэ, псауныгъэр къэухъумэгъэнымкIэ министерствэм пае республикэм ипредпринимательхэм яшIоигъоныгъэ­кIэ тхьабылхэм Iоф языгъэ­шIэщт (ИВЛ) аппарати 4 ыкIи лъыкъе­кIокIым Iоф езыгъэшIэрэ (ЭКМО) аппарати 4 къащэфыгъ. Джащ фэдэу Адыгэ Республикэм и Президентыгъэу Шъэумэн Хьазрэт иунэе мылъкукIэ Инэм дэт сымэджэщым пае тхьабылхэм Iоф языгъэшIэщт аппарати 4 къафаригъэщагъ. Адыгеим и ЛIышъхьэу КъумпIыл Мурат иIэпэчIэгъэнэ фонд къыхихыгъэ сомэ миллион 50-мкIэ Iэзэгъу уцхэр къащэфыгъэх. Джыри мы Iофыгъом пэIухьащт сомэ миллион 54-рэ федеральнэ гупчэм къытIупщынэу ежэх. Пкъышъолым нэмысэу зэрэ­плъырэр зэрашырэ пкъыгъохэм, респираторхэм, хэушъхьафыкIыгъэ шъуашэхэм якъызIэкIэ­гъэхьан лъагъэкIуатэ. Бэрэ агъэфедэрэ маскэхэм ядын зэтезгъэуцогъэ предприятиехэм джыри а IофшIэныр лъыпадзэнэу республикэм ипащэ унашъо ышIыгъ.

Iофхэм язытет нахь дэй зы­хъукIэ сымаджэхэр зыдащэщтхэ сымэджэщи 3 агъэнэфагъ. Коронавирусыр зиIэн зылъэкIыщт сымаджэхэр чIагъэгъолъхьанхэу Мыекъопэ къэлэ сымэджэщым чIыпIи 180-рэ, зэпахырэ узхэм зыщяIэзэхэрэ Адыгэ республикэ сымэджэщым чIыпIи 150-рэ, Инэм — чIыпIи 100 агъэхьазырыгъэх.

Iэшъынэ Сусан.