Зэрэдунаеу къиныгъохэм ахэтми
Зэпахырэ узэу «Коронавирус Covid 19»-м къиныгъуабэ къыздихьыгъэми, тичIыгулэжьхэм гъэтхэ IофшIэнхэр къызэтырагъэуцуагъэхэп.
АР-м мэкъу-мэщымкIэ и Министерствэ мэлылъфэгъум и 6-м тызэрэщигъэгъозагъэмкIэ, гектар 102657-м щыщэу 19186-р халъхьагъ. Ащ инахьыбэр, 14494-р, тыгъэгъаз.
Джэджэ районыр мы уахътэм апэ ит. Ащ ичIыгулэжьхэм гъэтхэсэ гектар 8116-рэ апхъыгъ. Ащ щыщэу 6542-р тыгъэгъаз, 1490-р чылапхъэ ашIыщт натрыф, адрэхэм хэтэрыкIхэр ахагъэтIысхьагъ.
Кощхьэблэ районым ичIыгулэжьхэр мыбэдэдэу ауж къенэх. Гектар 4803-у ахэм хагъэкIыгъэм инахьыбэр, 3232-р тыгъэгъаз, 350-р гъэтхэсэ хьэ, зэнтхъыр гектар 520-рэ, натрыфыр 701-рэ мэхъух.
Красногвардейскэ районым гъэтхасэхэм гектар 14996-рэ арагъэубытынэу щагъэнэфагъ. Ащ щыщэу халъхьагъэр 3307-р ары. Нахьыбэр тыгъэгъаз, гектар 3100-рэ, адрэхэр илъэсыбэм къэкIыжьырэ уц, зэнтхъы, хьэ.
Гъэтхэсэ лэжьыгъэхэм яхэлъхьан дакIоу бжыхьасэхэми химпрополкэ ащашIы. Министерствэм тызэрэщигъэгъозагъэмкIэ, Шэуджэн районым а IофшIэнхэр щаухыгъэх, Кощхьэблэ, Красногвардейскэ, Джэджэ районхэм ыкIи къалэу Мыекъуапэ ячIыгулэжьхэми гъунэм рафылIагъ.
ПстэумкIи бжыхьасэу Адыгеим мыгъэ иIэр гектар 115388-рэ мэхъу. Ар 2019-рэ илъэсым Iуахыжьыгъэм нахьи гектар 8922-кIэ нахьыб. Ащ щыщэу 92699-р коцы, 13400-р бжыхьэсэ хьэ, 9778-р рапсым рагъэубытыгъ.
Бжыхьасэхэм игъом ыкIи икъоу зэряшIушIагъэхэм, чIыгъэшIухэр зэраIакIагъэхьагъэхэм ишIуагъэкIэ язытет уигъэрэзэнэу зэрэщытым мэкъу-мэщымкIэ Министерствэм къыщыкIагъэтхъыгъ.
ХЪУТ Нэфсэт.