Адыгеим коронавирусым иуплъэкIун епхыгъэ тестирование щашIынымкIэ гумэкIыгъо щыIэп. Ащ фэгъэхьыгъэ къэбар АР-м псауныгъэр къэухъумэгъэнымкIэ иминистрэу Мэрэтыкъо Рустем Адыгэ Республикэм и ЛIышъхьэу КъумпIыл Мурат къыриIуагъ.

Роспотребнадзорым и ГъэIорышIапIэу Адыгеим щыIэм фэдэу республикэ инфекционнэ сымэджэщыми ыпэкIэ зигугъу къыщытшIыгъэ уплъэкIунхэр щашIых. Коронавирусыр къыхагъэщыным фытегъэпсыхьэгъэ уплъэкIун 580-рэ ащ щырагъэ­кIокIыгъ. Джащ фэдэу ищыкIагъэ хъумэ агъэфедэнэу Мыекъопэ къэлэ сымэджэщым лабораторие щагъэпсы.

Роспотребнадзорым илабораториеу коронавирусым икъы­хэгъэщын епхыгъэ уплъэкIунхэр зыщашIырэм бэмышIэу Адыгеим и ЛIышъхьэу КъумпIыл Мурат щыIагъ. Мы узым кIэу къыхэгъэщыгъэн ылъэкIыщтхэри мыщ щаушэтых.

КъумпIыл Мурат врачхэм гущыIэгъу афэхъугъ, Iоф зэра­шIэрэм зыщигъэгъозагъ ыкIи медицинэм иIофышIэхэм чанэу япшъэрылъхэр зэрагъэцакIэрэмкIэ зэрафэразэр игущыIэ къыщыхигъэщыгъ.

— Шъори, врачэу, медици­нэм илIыкIохэу республикэм Iоф щызышIэрэ пстэуми «тхьа­шъуе­гъэпсэу» къышъуасIо сшIоигъу. ВирусыкIэм зимыушъомбгъуным фэшI амалэу шъуиIэр зэкIэ шъо­шIэ. Медикхэр арых гумэкIыгъом пэуцужьхэрэм яапэрэ сатыр хэтхэр. Къинэу шъулъэ­гъурэм республикэм щыпсэурэ пстэуми уасэ къыфашIын, лъы­тэныгъэ къышъупагъохын фаеу сэлъытэ. Пшъэрылъэу тиIэр медикхэм Iоф ашIэн алъэкIынэу ящыкIагъэр ядгъэ­гъотыныр ыкIи япсауныгъэ къэтыухъумэныр ары, — къы­Iуагъ Адыгеим и ЛIышъхьэу КъумпIыл Мурат.

Гигиенэм ыкIи эпидемиологием и Гупчэ иврач шъхьаIэу Айтэк Мариетрэ микробиологиемкIэ лабораторием ипащэу Хъыщт Нэфсэтрэ мыщ Iоф зэ­рэщашIэрэр республикэм и ЛIышъхьэ къырагъэлъэгъугъ ыкIи уцугъо уцугъоу анализым ишIын къыфаIотагъ. ПстэумкIи зэфэ­хьысыжь ашIыным сыхьатиплI пэIохьэ. ЗэрэхъурэмкIэ, а мэфэ дэдэм джэуапыр хьазыр.

Роспотребнадзорым и ГъэIорышIапIэу Адыгеим щыIэм ипа­щэу Сергей Завгороднем къызэриIуагъэмкIэ, коронавирусым икъыхэгъэщын епхыгъэ уплъэ­кIуным специалист 21-мэ Iоф дашIэ. Лабораторием къэмыуцоу Iоф ышIэным фэшI сменищ агъэпсыгъ.

Коронавирусым икъэбар къы­­зежьагъэм къыщыублагъэу мыщ анализ мини 3-м ехъу ща­шIыгъ. Анахьэу анаIэ зыты­рагъэты­хэрэр IэкIыбым къикIы­жьыгъэхэр, сымаджэхэм гущыIэгъу афэхъугъэхэр, пэтхъу- Iутхъур къызэутэкIыгъэхэр арых.

Роспотребнадзорым къызэритырэмкIэ, коронавирусыр къыхэгъэщыгъэным епхыгъэ уплъэкIун 500 фэдиз мафэ къэс респуб­ликэм щашIын амал щыI. Тест-системэхэр щыIэх, джыри мини 6 фэдиз Адыгеим къыIэкIэхьащт.

Адыгэ Республикэм псауныгъэр къэухъумэгъэнымкIэ иминистрэу Мэрэтыкъо Рустем къызэриIуагъэмкIэ, КъумпIыл Мурат мы ведомствэм пшъэ­рылъ фишIыгъ тест-системэ лыехэр, Iэзэгъу уцхэр зэрагъэ­гъотынхэу ыкIи ищыкIагъэ зы­хъукIэ, ахэр медицинэм иIофы­шIэхэм аIэкIагъэхьанхэу.

Гъонэжьыкъо Сэтэнай.