Ныбджэгъу лъапIэхэр! Урысыем щыпсэухэу лъытэныгъэ зыфэсшIыхэрэр!

МыIофшIэгъу тхьэмафэу Урысыем щалъытэгъагъэр ыкIэм фэкIо. Врачхэм, медсестрахэм, медицинэ учреждениехэм аIутхэм гъэлъэшыгъэ шIыкIэм тетэу яIофшIэн лъагъэкIуатэ.

Джыдэдэм ахэр чIыпIэ къин дэдэ итых. Ахэр ары сымэджэщхэм, инфекционнэ отделениехэм ачIэтхэр, зэпахырэ узэу зызыушъомбгъурэм игъогупэ пызыбзыкIыхэрэр, сымаджэхэм яIазэ­хэрэр, уз Iаем цIыфхэр щызыухъумэхэрэр. Тимедицинэ IофышIэхэм лъэшэу сызэрафэразэр къызыщисIотыкIырэ гущыIэхэм тихэгъэгу ис пстэуми къадырагъэштэнэу къысщэхъу.

ХэгъэгумкIи, обществэмкIи мэхьанэшхо зиIэ нэмыкI лъэныкъохэм ащылажьэхэрэми непэ япшъэрылъ агъэцакIэ. Шъо пстэуми сызэрэшъуфэразэр къасIо сшIоигъу.

Волонтерхэм, гуфакIохэм, цIыф гумыпсэфхэм коронавирусым пэуцужьыгъэнымкIэ пшъэдэкIыжь зэрахьырэр къызыгурыIуагъэхэм, хэбзэ Iэшъхьэтетхэмрэ врач-специалистхэмрэ игъоу алъэгъухэрэр дэх имыIэу зыгъэцакIэ­хэрэм, ашъхьэ, ягупсэхэм, яIахьылхэм япсауныгъэ, къэзыуцухьэхэрэм ящынэгъончъагъэ афэгумэкIыхэрэм тхьашъуе­гъэпсэу шъосэIо.

Тхьэмафэр мыIофшIэгъоу зэрэхэгъэгоу зэрэщалъытэгъагъэм, шъолъырыбэмэ ащыпсэухэрэм яунэхэм арысынхэу зэрафагъэпытэгъагъэм яшIуагъэ къэкIуагъ хэбзэ къулыкъухэм зызэкIаугъоенымкIэ, псауныгъэм икъэухъумэн фэгъэхьыгъэ амалхэр нахьыбэ шIыгъэнхэмкIэ, ти­опы­ти, нэмыкI хэгъэгухэм яопыти къызфэдгъэфедэзэ, зэпахырэ узым амал зэриIэкIэ нахь пхъашэу тыпэуцужьынымкIэ.

Ащ мэхьанэшхо иIэу сэлъытэ: зы­ныбжь хэкIотагъэхэр ащ фэдэ узым джыдэдэм щытыухъумэнхэ, коронавирусым кIэлэцIыкIу IыгъыпIэхэм, гурыт, апшъэрэ еджапIэхэм ыкIи нэмыкI еджапIэхэм зыкъыщятымыгъэштэн тлъэкIыгъ.

Ащ епхыгъэу упчIэ къэуцу тапэкIэ тшIэн, унашъохэу тштэн фаехэм афэгъэ­хьыгъэу. Ахэр тштэхэзэ, щынагъо джыри зэрэщыIэр къызэрэдгурыIон фаер хэсэгъэунэфыкIы. Специалист-вирусолог­хэм зэралъытэрэмкIэ, зэпахырэ узым лъэш дэдэу зызыщиушъомбгъущт уахътэр дунайми, тихэгъэгуи джыри апэкIэкIыгъэп.

Ащ епхыгъэу унашъо сэшIы мазэм ыкIэм нэс, нэмыкIэу къэпIон хъумэ, мэлылъфэгъум и 30-м нэс Iоф замы­шIэщт режимыр лъыгъэкIотэгъэнэу. Iо­фы­шIэхэм ялэжьапкIи къэгъэнэжьыгъэн зэрэфаер къыхэсэгъэщы.

Шъолъыр зэфэшъхьафхэми, муниципалитетхэми Iофхэм язытет щызэфэдэп. Тихэгъэгу чIыпIэшхо зэлъеубыты, тыди зэфэдизэу цIыфхэр щыпсэухэрэп. Феде­рацием ишъолъырхэу Москва фэдэхэу коронавирусым зызыщиушъомбгъурэр, федеральнэ, къэлэ хэбзэ Iэшъхьэтетхэм сыд фэдэ амалхэр зэрамыхьагъэкIи, Iофым изытет нахьышIу зышIын зымы­лъэкIхэрэр щыIэх. Ау зы нэбгыри ар къызыщямыутэлIэгъэ шъолъырхэри щыIэх.

Ащ епхыгъэу чIыпIэ горэхэм шапхъэ­хэр нахь ащагъэлъэшын фаеу хъущт, къэхъущтым фэхьазырхэу нэмыкIхэм чIыпIэ унашъохэр ащаштэми хъущт. Ащ фэдэ шапхъэхэр къыдэлъытэгъэнхэ фае.

Ащ епхыгъэу си УказкIэ шъолъырхэм, Федерацием ишъолъырхэм япащэхэм полномочие тедзэхэр афэзгъэзэщтых. Мы тхьэмафэр имыкIызэ ячIыпIэхэмкIэ, цIыфхэм япсауныгъэкIэ, ящынэгъончъа­гъэкIэ, экономикэмкIэ, инфраструктурэ шъхьаIэмкIэ къякIунэу щыт пэшIоры­гъэшъ Iофтхьабзэу зэрахьащтхэр ахэм къыхахын фаеу хъущт.

Джыри зэ къыкIэсэIотыкIыжьы, Iофхэм язытет къыпкъырыкIыхэзэ, Урысыем и Президент и Указ диштэу ежь шъолъыр­хэм унашъохэр аштэщтых Федерацием ишъолъыр е ащ имуниципалитет шъхьаф­хэм режимэу арылъыщтымкIэ, учреждениехэу, организациехэу зиIофшIэн къы­зэтезгъэуцон фаехэмкIэ, цIыфхэм ящы­нэгъончъагъэ къыдалъытэзэ, зиIоф­шIэн лъызыгъэкIотэн зылъэкIыщтхэмкIэ.

ЫпэкIэ зэрэщытыгъэм фэдэу Iоф зышIэщтхэр хабзэм икъулыкъухэр, зиIоф­шIэн къызэтезгъэуцон зымылъэкIырэ предприятиехэр, медицинэ учреждениехэр, аптекэхэр, цIыфхэм нахьыбэрэ агъэфедэрэ пкъыгъохэр зыщэрэ тучанхэр, цIыфхэм ящыIэныгъэкIэ ящыкIэгъэ къулыкъухэр ары.

Предприятие гъэнэфагъэхэм, гъэсэныгъэ языгъэгъотырэ, научнэ организациехэм апае джыри шапхъэхэр гъэлъэшыгъэнхэ фаеу зыхъукIэ, шъолъырхэм ащ фэдэ яунашъокIэ федеральнэ Правительствэм дырагъэштэн фае.

Iофыр зэрэлъыкIуатэрэм елъытыгъэу унэшъо тедзэхэр тштэщтых. Iофхэр нэмыкIэу зызэпыфэхэкIэ, мыIофшIэгъу мафэхэр нахь макIэ тшIыжьыни тлъэ­кIыщт. Урысыем щыпсэухэу лъытэныгъэ зыфэтшIыхэрэр! Хэбзэ Iэшъхьэтетхэм, врачхэм, специалистхэм игъоу къышъу­фалъэгъухэрэм атетэу шъузекIонэу сышъолъэIу.

ШъукъызэрэсэдэIугъэмкIэ сышъуфэраз. Тхьам псауныгъэ къышъует.