Зэрэфэхьазырхэм зыщигъэгъозагъ
Адыгэ Республикэм и ЛIышъхьэу КъумпIыл Мурат псауныгъэр зыщагъэпытэрэ комплексэу «Лэгъо-Накъэ» щыIагъ. Коронавирусыр къызпыхьэгъэн ылъэкIыщт цIыфхэр мэфэ 14-м къыкIоцI карантинкIэ зыщаIыгъыщтхэ чIыпIэу мыр щыт.
Республикэм ипащэ игъусагъэх федеральнэ инспектор шъхьаIэу Сергей Дрокиныр, АР-м хэгъэгу кIоцI IофхэмкIэ иминистрэу Владимир Алай, Адыгеим IофшIэнымкIэ ыкIи социальнэ хэхъоныгъэмкIэ иминистрэу Мырзэ Джанбэч.
Зэпахырэ узыр къызпыхьагъэхэр щаIыгъынхэмкIэ «Лэгъо- Накъэм» амалэу IэкIэлъхэм, ищыкIагъэ хъумэ ахэр зэрагъэгъолъхьащтхэ чIыпIэхэр зэрагъэхьазырыгъэхэм Адыгеим и ЛIышъхьэ зыщигъэгъозагъ.
Мы комплексым игъэIорышIакIоу Татьяна Мамонтовам къызэриIуагъэмкIэ, обсерваторым чIыпIи 113-рэ къыдыхалъытагъ. Ахэр зэкIэ зэрифэшъуашэу зэтегъэпсыхьагъэх: Wi-Fi арыщагъ, телевизор, унагъом щагъэфедэрэ техникэр арыт. Джащ фэдэу мафэм гъогогъуи 5-рэ агъэшхэщтых, ащ пае гъомлэпхъэ IэпэчIэгъанэ яI.
КъулыкъушIэхэр мыщ фэдэ IофшIэным зэрэфэхьазырхэм республикэм ипащэ кIэупчIагъ. Псауныгъэр зыщагъэпытэрэ комплексым ищыкIэгъэн ылъэкIыщтхэ цIыфыр къэзыухъумэрэ ыкIи дезинфекцие зэрашIырэ пкъыгъохэм, тест-системэхэм япчъагъэ къалъытэнышъ ыкIи ахэр ащ IэкIагъэхьанхэу КъумпIыл Мурат пшъэрылъ афишIыгъ Роспотребнадзорым АдыгеимкIэ и ГъэIорышIапIэрэ АР-м псауныгъэр къэухъумэгъэнымкIэ и Министерствэрэ.
— Обсерваторым чIэдгъэгъолъхьан фэе цIыфхэр непэ тиIэхэп, ау Iофхэм язытет зыкъэзэблихъун зэрилъэкIыщтым тыфэхьазырын фае. Зэпахырэ узым зимыушъомбгъуным фэшI къыттефэрэр зэкIэ дгъэцэкIэным мэхьанэшхо иI. Джыри зэ къыхэсэгъэщы — пандемием пэшIуекIогъэнымкIэ анахь шIогъэшхо къэзытыщтыр шъуиунэхэм шъуакъырымыкIыныр ары. Ащ къыхэкIыкIэ республикэм щыпсэухэрэм закъыфэсэгъазэ лъэбэкъоу тшIыхэрэр къагурыIонэу ыкIи режимыр агъэцэкIэнэу. Тызэгъусэмэ ары коронавирусым тебэнын зытлъэкIыщтыр, — къыIуагъ КъумпIыл Мурат.
Шъугу къэдгъэкIыжьын, санаториеу «Кавказ» зыфиIорэри IэпэчIэгъэнэ обсерваторэу республикэм щагъэхьазыры. IэкIыб къэралыгъохэм къарыкIыжьыгъэхэр ыкIи коронавирусыр зиIэ цIыфхэм акIэрыхьагъэхэр узыр зыщызэпахырэ пIалъэу мэфэ 14-м къыкIоцI алъыплъэнхэм фэшI обсерваторхэу агъэпсыщтхэр медикэ-санитарнэ амалхэм зэу ащыщых. Узыр иIэу къызагъэшъыпкъэжьыкIэ, а сымаджэр зэпахырэ узхэм зыщяIазэхэрэ республикэ сымэджэщым ащэщт.
ТХЬАРКЪОХЪО Адам.
