ГухэкI нахь мышIэми, дунаим зыщызыушъом­бгъугъэ COVID-19-р тиреспубликэ джыри зэрит. Ар цIыфыбэхэм къя­мыутэкIы­ным фэшI типащэ­хэм Iофтхьэбзэ гъэнэфа­гъэ­хэр зэрахьэх. Ау нахьыбэр зэ­лъытыгъэр тэры, цIыфхэр ары. Тэ тшъхьэкIэ зызэрэтыухъу­мэрэм ишIуагъэ къэкIощт. Амал зэриIэкIэ унэм тыкъимыкIэу, къэбзэныгъэм ишапхъэхэр дгъэ­цакIэхэмэ, нахь псынкIэу ти­IофшIэн тыфежьэжьыщт. Тызэгъусэу коронавирусым Адыгеим зыщимыушъомбгъуным ты­фэжъугъэбан!

Адыгэ Республикэм псауныгъэр къэухъумэгъэнымкIэ и Ми­нистерствэ аужырэ къэбарэу къытыгъэмкIэ, узыр къызэутэ­кIыгъэу агъэунэфыгъэр нэбгыри 4, 11-мэ — яIэу егуцафэх. Нэ­бгырэ 27-рэ пэтхъу-Iутхъум ыгъэгумэкIыхэу зэпахырэ узхэм зыщяIэзэхэрэ сымэджэщым чIэлъых.

УплъэкIунхэр зэхащэх

ЩэфакIохэм яфитыныгъэхэр ыкIи цIыфым игупсэфыныгъэ къэухъумэгъэнхэмкIэ Феде­ральнэ къулыкъум и ГъэIорышIапIэу Адыгэ Республикэм щыIэм къызэритыгъэмкIэ, 2020-рэ илъэсым ия 13-рэ тхьамафэу икIыгъэм пэтхъу-Iутхъур къызэузыгъэ нэбгырэ 563-рэ агъэ­унэфыгъ.

Къалэу Мыекъуапэ пэтхъу-Iутхъур къызэузыгъэу нэбгырэ 211-рэ щатхыгъ, эпидемием ишапхъэу агъэнэфагъэм процент 66-кIэ ар нахь макI.

Пэтхъу-Iутхъоу къекIокIыхэрэр зыфэдэ лъэпкъхэр зэпымыоу ауплъэкIух. 2019-рэ илъэсым иIоныгъо мазэ къыщегъэжьа­гъэу 2020-рэ илъэсым игъэтхапэ хэтэу лабораторнэ уплъэкIунхэм къызэрагъэлъэгъуагъэмкIэ, «грипп А ыкIи В» зыфиIохэрэм явирусхэр къыхагъэщыгъэх ыкIи гриппым хэмыхьэхэрэ риновирусхэр, аденовирусхэр, Rs-­ви­русхэр къыхэкIыгъэх.

ЕтIупщыгъэу дезинфекцие ашIых

Фэтэрыбэу зэхэт унэхэм яподъездхэм, зэкIэми зэдагъэфедэрэ чIыпIэхэм, кIэлэцIыкIу джэгупIэхэм, щэпIэ чIыпIэхэм етIупщыгъэу пэшIоры­гъэшъ санитарнэ Iоф­тхьабзэхэр ащызэрахьэх. Мыщ епхыгъэ унашъор Оперативнэ штабэу республикэм щызэхащагъэм ышIыгъ.

А унашъом тетэу Роспотребнадзорым и ГъэIорышIэпIэ шъхьаIэу Адыгеим щыIэм ыпшъэ­кIэ зигугъу къэтшIыгъэ чIыпIэхэр ТСЖ-хэм, гъэIоры­шIэ­кIо компаниехэм дезинфекцие зэрашIыщтхэ шIыкIэр зэрыт тхыгъэ афыригъэ­хьыгъ.

Iэшъынэ Сусан.