Адыгэ Республикэм и ЛIышъхьэу КъумпIыл Мурат иунашъокIэ Адыгеим иэкономикэ зыпкъ итэу хэхъоныгъэ ышIыным фэгъэзэгъэ Комиссие зэхащагъ.

Кризисыр къызэутэкIыгъэхэм ягумэкIыгъохэр дэгъэзыжьы­гъэнхэм фэшI министерствэхэм, ведомствэхэм ыкIи муниципалитетхэм предложе­ниеу къахьыхэрэр ащ щызэ­хафыщтых, чIыпIэ къин ифа­гъэхэм IэпыIэгъу зэрафэхъущтхэ шIыкIэхэм яусэщтых.

ЫпэкIэ зигугъу къэтшIыгъэ структурэр координационнэ къулыкъоу щыт. Адыгеим икъэ­ралыгъо гъэцэкIэкIо къулыкъу­хэм, федеральнэ органхэм ягъэцэкIэкIо къулыкъухэу чIыпIэхэм ащыIэхэм, чIыпIэ зыгъэ­IорышIэжьыпIэхэм япащэхэр общественнэ организациехэм ыкIи шIэныгъэм ялIыкIохэм, предпринимательхэм зэдэлэжьэныгъэ зэдыряIэу Iоф зэдашIэным ар фэгъэзэгъэщт. Адыгеим иэкономикэ зыпкъ итэу хэхъоныгъэ ышIыным, джащ фэдэу коронавирусым республикэм зыщимыушъом­бгъуным афэIорышIэщт Iофтхьабзэхэр агъэ­нэ­фэнхэр ыкIи зэхащэнхэр пшъэ­рылъ шъхьаIэу щытых.

Комиссием ипшъэрылъхэм джащ фэдэу ахэхьэх Iофтхьа­бзэхэм ягъэцэкIэн пэIухьащт мылъкур гъэнэфэгъэныр, Iоф­шIэнхэр зэрэзэхащэхэрэм лъыплъэныр, анахьэу анаIэ зытырагъэтыщт лъэныкъохэр къы­хэгъэщыгъэнхэр, ахэм адэлэ­жьэгъэныр. Джащ фэдэу цIыфхэр социальнэу ухъумэгъэнхэм, ахэм ящыкIэгъэ IэпыIэгъур ягъэгъотыгъэным, псауныгъэр къэухъумэгъэным ыкIи Iэзэгъу уцхэр аIэкIагъэхьаным ынаIэ тыригъэтыщт.

Экономикэм изытети янэплъэ­гъу зэрарамыгъэкIыщтыр къы­хэтэгъэщы. Бизнес цIыкIумрэ гурытымрэ IэпыIэгъу афэхъугъэ­ныр Iофыгъо шъхьаIэу щыт. Нэужым Iоф зэрашIагъэм изэ­фэ­хьысыжьхэр АР-м и ЛIышъхьэ IэкIагъэхьащтых.

Адыгеим щыпсэурэ цIыфхэм яIофыгъохэр шъолъырым ихэ­бзэ къулыкъухэм янэплъэгъу рагъэ­кIыхэрэп. Социальнэ, псауныгъэм икъэухъумэн, бизнесым, Iэзэгъу уцхэм, нэмыкI лъэныкъохэмкIи гумэкIыгъо къэуцумэ, ащ идэгъэзыжьын Iоф дашIэ, чIыпIэ къин ифагъэхэм яшIуагъэ зэрарагъэкIыщтым пылъых. Гъонэжьыкъо Сэтэнай. .