Коронавирусым пэшIуекIогъэнымкIэ Оперативнэ штабым изэхэсыгъо Адыгеим и ЛIышъхьэу КъумпIыл Мурат зэрищагъ.

Ащ зэрэхигъэунэфыкIыгъэмкIэ, чIыпIэ къинэу тызэрыфагъэм лъэныкъо пстэоу эпиде­мием ебэныхэрэм ткIуачIэхэр ыкIи тиамалхэр зэхэлъхэу псын­кIэу зэдэдгъэфедэхэмэ, УФ-м и Президентрэ и Правительствэрэ къытфагъэуцугъэ пшъэрылъхэр дгъэцакIэхэмэ ишIуагъэ къэкIощт.

Урысыем и Президент мэхьанэшхо зэритыгъэхэм ащыщ чIыпIэ, шъолъыр ыкIи федеральнэ структурэхэм яIо зэхэлъэу IофшIэныр зэхащэныр.

— Коронавирусым тыпэшIуе­кIоным ыкIи шъолъырхэм социальнэ-экономикэ зыпкъ итыныгъэ яIэным афэшI Владимир Путиным пшъэрылъыкIэхэр бэмышIэу къытфигъэуцугъэх. Ащ фытегъэпсыхьэгъэ федеральнэ шапхъэхэр аштагъэх. Джы ахэм яятIонэрэ едзыгъо агъэхьазыры. Ащ ишIуагъэкIэ бизнес цIыкIум ыкIи гурытым, экономикэм илъэ­ныкъохэм ащыщхэм чIыпIэ зэжъоу зэрыфагъэхэр зэпачын алъэкIыщт. Тэ анахьэу тынаIэ зытетын фаер къытфагъэуцурэ пшъэрылъхэр шIокI имыIэу ти­шъолъыр щыдгъэцэкIэнхэр, ищы­кIагъэмэ хэгъэхъожьынхэр фэт­шIынхэр ары. Бизнес цIыкIум ыкIи гурытым IэпыIэгъу арагъэ­гъотыщт — хэбзэIахь тынхэмкIэ фэгъэкIотэн пIалъэр агъэфедэным къыщегъэжьагъэу, кредитхэмкIэ чIыфэу ателъым итыжьын къафэпсынкIэным нэсэу, — къыIуагъ КъумпIыл Мурат.

Бизнес цIыкIумрэ гурытымрэ зыпкъ итынхэм, хэхъоныгъэ ашIынымкIэ IэпыIэгъум иама­лыкIэу къежьагъэхэм цIыфхэр ащыгъэгъозэгъэнхэ фаеу рес­публикэм ипащэ хигъэунэфы­кIыгъ. Джащ фэдэу пащэм ынаIэ зытыраригъэдзагъэхэм ащыщ социальнэ пшъэрылъхэр зэрагъэцакIэхэрэм лъыплъэгъэныр. Мыщ къыхеубытэх пенсиехэр, лэжьапкIэр, пособиехэр, зэрэсымаджэхэмкIэ тхьапэхэм апкIэ игъом зэраратынхэ фаер ыкIи джы унэшъуакIэм диштэу ахэр МРОТ-м нахь макIэ хъущтхэп.

ЦIыфхэр чIыпIэ къинэу зэрыуцуагъэхэр къызфагъэфедэзэ уасэхэр къыдамыгъэкIоенхэм лъыплъэнхэу КъумпIыл Мурат пшъэрылъ афишIыгъ. Адыгэ Рес­публикэм экономикэ хэхъоныгъэмкIэ ыкIи сатыумкIэ иминистрэу Геннадий Митрофановым къызэриIуагъэмкIэ, гъомы­лэпхъэ продукциер икъу фэдизэу ыкIи IэпэчIэгъанэ хъущтхэр республикэм зэригъэгъотыгъэх. Социальнэ мэхьанэ зиIэ товар 52-мэ алъэныкъокIэ мафэ къэс уасэхэм алъэплъэх. Продукцие гъэнэфагъэ щымыIэу агъэунэфыгъэп.

Адыгэ Республикэм экономикэмкIэ ыкIи мэкъу-мэщымкIэ иминистерствэхэм КъумпIыл Мурат унашъо афишIыгъ рес­публикэм ит предприятиехэм, къыдэгъэкIыжьын отраслэр хэтэу, зыпкъ итэу Iоф ашIэнымкIэ амалышIухэр афызэхащэнхэу. Экономикэм зыпкъ итэу хэхъоныгъэ ышIынымкIэ бизнесым IэпыIэгъу зэрэфэхъущтхэ амалхэр пхырыщыгъэнхэмкIэ штаб зэхащэнэу Премьер-ми­нистрэу Александр Наролиным фигъэпытагъ.

— Бизнес цIыкIум ыкIи гурытым епхыгъэ предприятиехэм ыкIи организациехэм яIофшIэн непэ къызэтетымыгъэуцоным мэхьанэшхо иI. ТапэкIэ зыпкъ итэу тишъолъыр хэхъоныгъэ ышIыныр ыкIи гъэлъэшыгъэ шIыкIэм ирежим тытетэу Iоф зэрытшIэрэм шIуагъэ къытэу тыкъыхэкIыжьыныр мыщ бэкIэ елъытыгъэщт, — къыкIигъэт­хъыгъ республикэм ипащэ.