Урысые Федерацием и Президент гъэтхапэм и 25-м ышIыгъэ унашъом тетэу гъэтхапэм и 30-м къыщегъэжьагъэу мэлылъфэгъум и 3-м нэс мыIофшIэгъу мафэхэу алъытагъ, ащ пае къэмынэу IофшIэн языгъэгъотыхэрэм лэжьапкIэр IофышIэхэм аратыщт. Урысыем ишъолъыр щыпсэухэрэм санитарнэ-эпидемиологие гупсэфыныгъэ ягъэгъотыгъэным мы унашъор фэIорышIэ.Нэужым УФ-м социальнэ хэхъоныгъэмкIэ ыкIи IофшIэ­нымкIэ и Министерствэ а тхьамафэм IофшIакIэр зыфэдэщтыр къыгъэнэфагъ, ащ дакIоу, Iоф зэрамышIагъэм пае къулыкъу­шIэхэм ялэжьапкIэ агъэмэкIэнэу зэрэщымытыр ведомствэм къыхигъэщыгъ.

1. Iофэу ашIагъэм елъыты-гъэу лэжьапкIэ зэратыхэрэм Iоф зыщамышIэщт тхьамафэм те­лъытагъэу зэряфэшъуашэу ахъщэкIэ агъэшIощтых. Ар зыфэ­дизыщтыр IофшIэн языгъэгъо­тырэм ишэпхъэ акт итхагъэм къы­гъэнэфэщт.

2. Гъэтхапэм и 30-м къыщегъэжьагъэу мэлылъфэгъум и 3-м нэс Iоф зышIэрэ цIыфыр отпуск кIуагъэу тефагъэмэ, зызщигъэ­псэфыщт мафэхэм мы тхьама­фэр ахалъытэщтэп ыкIи отпускыр лъыкIуатэрэп.

3. Iоф зыщамышIэрэ мафэр зыгъэпсэфыгъо мафэм ыкIи мэфэкI зыгъэпсэфыгъо мафэхэм ахалъытэрэп, арышъ, лэжьапкIэр къызэрыкIоу къалъытэщт.

4. Унашъом тетэу Iоф зыщамышIэщт мафэхэу агъэнэфагъэ­хэр мыщ фэдэ организациехэм яIофышIэхэм афэгъэхьыгъэп:

• медицинэ ыкIи уц щэпIэ организациехэр, ахэм якъыдэгъэкIын-технологие IофшIэн зы­гъэцэкIэрэ организациехэр, джащ фэдэу социальнэ фэIо-фашIэхэр зыгъэцэкIэрэ организациехэр;

• техническэ амалхэм ялъытыгъэу зиIофшIэн къызэтебгъэуцон умылъэкIыщт организациехэу зэпымыоу Iоф зышIэхэрэр;

• гъомылапхъэхэр ыкIи щы­IакIэм апэу щагъэфедэрэ товархэр аIэкIэзгъахьэхэрэ организациехэр; ахэр къезыщэкIы­хэрэ транспортхэр зэпхыгъэхэ организациехэр;

• ошIэ-дэмышIэ Iофыгъо зыщыщыIэм шIокI зимыIэ IофшIэнхэр зыгъэцакIэхэрэр; ухъумэн ыкIи дезинфекцие зэрашIырэ амалхэр, медицинэ пкъыгъохэр, уц Iэзэгъухэр, нэмыкIхэри къыдэзыгъэкIырэ предприятиехэр, цIыфхэм япсауныгъэ къэзыу­хъумэрэ ыкIи зэпахырэ узыкIэу коронавирусым зиушъомбгъуным пэуцужьырэ организациехэр;

• УФ-м ПенсиехэмкIэ ифонд ыкIи ащ ишъолъыр органхэу пенсие ыкIи нэмыкI социальнэ тынхэр цIыфхэм аIэкIэзыгъа­хьэхэрэр;

• УФ-м социальнэ страхованиемкIэ и Фонд ыкIи ащ епхыгъэ шъолъыр органхэу пIэлъэ гъэнэфагъэкIэ цIыфым Iоф зэримышIэрэмкIэ ыкIи ны зэрэ­хъугъэмкIэ, IофшIапIэм щыIэу тхьамыкIэгъо Iоф къызэхъулIагъэм шIокI зимыIэ страховой тынхэр язытыхэрэр; медицинэ организациехэм медицинэ IэпыIэгъоу агъэцэкIагъэм ыпкIэ къафэзытIупщырэр;

5. Унашъом ыпкъ къикIыкIэ вахтэ шIыкIэм тетэу Iоф зышIэ­хэрэм яIофшIэн зэпыгъэугъэным епхыгъэ Iофыгъохэр Iоф-шIэн зэфыщытыкIэу лъэныкъуитIур зыкIэтхагъэм тетэу зэшIохыгъэныр.

6. ЫпшъэкIэ къэтпчъыгъэ ор­ганизациехэу Iоф зышIэхэрэр коронавирусым зыщаухъумэ­нымкIэ агъэцэкIэнхэ фэе Iоф­тхьабзэхэу Роспотребнадзорым къытыгъэхэр шIокI имыIэу зэрахьанхэу щыт. Ащ нэмыкIэу, мыхэм аIут IофышIэхэр IофшIэн языгъэгъотырэм зэзэгъыныгъэ дашIынышъ, техническэ амал аIэкIэлъымэ Iудзыгъэ шIыкIэм тетэу Iоф ашIэн фитых.

7. Федеральнэ къэралыгъо органхэм япащэхэр, УФ-м исубъектхэм якъэралыгъо хэбзэ органхэм ыкIи чIыпIэ зыгъэIоры­шIэжьыпIэхэм япащэхэр, къэ- бар жъугъэм иамалхэр къэзыгъэхьазырхэрэ ыкIи къыхэзыутыхэрэ организациехэм япащэхэм ежь-ежьырэу нэбгырэ пчъагъэу Iоф зышIэщтыр агъэ­нафэ, амал щыIэмэ Iудзыгъэ шIыкIэм техьэх;

8. МыIофшIэгъу тхьамафэу алъытагъэм Iоф зышIэнэу хъугъэ организациехэм япащэхэм цыхьэ афашIыгъэ объектхэм шIокI имыIэу ащагъэцэкIэнхэ фаер: терроризмэм, промышленнэ, транспортнэ щынэгъончъагъэм алъэныкъокIэ ухъу­мэгъэнхэр, унэшъо гъэуцугъэхэр ыкIи шапхъэхэр гъэцэкIэ­гъэнхэр.

Iэшъынэ Сусан.