Нэжъ-Iужъхэм япсауныгъэ янэплъэгъу рагъэкIырэп
Адыгэ Республикэм IофшIэнымкIэ ыкIи социальнэ ухъумэнымкIэ и Министерствэ къызэритырэмкIэ, «Старшее поколение» зыфиIорэ проектыр тишъолъыр чанэу щагъэцакIэ.
Ащ ишIуагъэкIэ, зыныбжь хэкIотагъэу Адыгеим щыпсэухэрэм ящыIэкIэ-псэукIэ нахьышIу хъущт. Пшъэрылъ шъхьаIэу проектым иIэр зыныбжь илъэс 65-м ехъугъэ нэжъ-Iужъхэу къоджэ псэупIэхэм ащыпсэухэрэр медицинэ организациехэм къаращэлIэнхэ, уплъэкIун тедзэхэр арагъэкIунхэ амал щыIэныр ары. Нахьыжъхэм япсауныгъэ гъэпытэгъэным, ягъашIэ хэгъэхъогъэным мы пстэури фэIорышIэщт.
Проектыр республикэм щагъэцэкIэным пае автомобиль 11 зэрагъэгъотыгъ. Ащ сомэ миллион 20-м ехъу пэIухьагъ. 2019-рэ илъэсым шышъхьэIум и 1-м къыщегъэжьагъэу къоджэ псэупIэхэм ащыпсэурэ нэжъ-Iужъхэм диспансеризацие арагъэкIунэу медицинэ учреждениехэм ащэх. Мыщ фэдэ Iофтхьабзэхэм яшIуагъэкIэ зыныбжь 65-м ехъугъэ нэбгырэ 2451-мэ медицинэ организациехэм уплъэкIунхэр ащафашIыгъэх. Адыгэ Республикэм псауныгъэр къэухъумэгъэнымкIэ и Министерствэ къызэритырэмкIэ, 2020-рэ илъэсым къоджэ псэупIэхэм ащыпсэухэрэ нэжъ-Iужъ нэбгырэ 5955-мэ скрининговэ Iофтхьабзэхэр афашIынхэ фае.
БлэкIыгъэ илъэсым республикэм ит унэ-интернатхэм ачIэсхэм ащыщэу зыныбжь хэкIотэгъэ 781-мэ прививкэхэр афашIыгъэх. Ащ сомэ мин 765-м ехъу пэIуагъэхьагъ.
Гъонэжьыкъо Сэтэнай.