«ЭкоЦентрэм» къеты
ПэIудзыгъэ шIыкIэм тетэу
Мы мафэхэм коронавирусым пэшIуекIорэ Iофтхьабзэу зэшIуахыхэрэм къахиубытэу, пыдзэфэ пытэхэм ядэщын фэгъэзэгъэ региональнэ операторым иучасткэу цIыфхэр зэуалIэхэрэм пэIудзыгъэ шIыкIэм тетэу Iоф ашIэ.
Гъэтхапэм и 25-м къыщегъэжьагъэу «ЭкоЦентрэм» иофисхэм цIыфэу ачIахьэрэр нахь макIэ ашIыгъ. Адресхэр шъугу къэтэгъэкIыжьых: къалэу Мыекъуапэ, урамэу Пионерскэр, 297-рэ, поселкэу Яблонов-скэр, урамэу Школьнэр, 10/1.
Аущтэу Iоф зэрашIэрэм хэкIым иIущын иягъэ екIыщтэп. ЗыгорэкIэ упчIэ шъуиIэ хъугъэмэ е хэкIыр зэрэIуащырэм къыщыкIагъэмэ, телефонэу шъузэрэтеощтхэр квитанциехэм арытхагъ, интернет нэкIубгъоу https://adygeja.clean-rf.ru зыфиIорэми ижъугъотэщт.
ПэIудзыгъэ шIыкIэм тетэу пIэлъэ гъэнэфагъэм офисхэм Iоф ашIэщт, зызэтырагъэуцожькIэ макъэ къэдгъэIущт.
Мэфэ благъэхэм шъукъямыж
Пыдзэфэ пытэхэм ядэщын фэгъэзэгъэ региональнэ операторым испециалистхэм псэупIэхэр къакIухьэзэ цIыфхэм заIуагъакIэ, хэкIыр зэрэIуащырэм ыуасэ къаугъои.
Джы мы мафэхэм, гъэтхапэм и 25-м къыщегъэжьагъэу мэлылъфэгъум и 12-м нэс, ахэм ар зэпагъэугъ. Коронавирусым зимыушъомбгъуным фытегъэпсыхьэгъэ Iофтхьабзэхэм ари ащыщ.
— ПсэупIэ кой администрациехэр зычIэт унэхэр ары менеджерхэр цIыфхэм зыщаIукIэ хабзэр. Ахэм мы уахътэм ачIагъахьэрэр нахь макIэ ашIыгъ. Ари мы Iофыр зэрэзэпыдгъэугъэм изы ушъхьагъухэм ащыщ, — къыIуагъ ООО-у «ЭкоЦентрэм» и Адыгэ шъолъыр къутамэ ипащэу Алыбэрд Налбый. 
Интернетыр бгъэфедэмэ
Пыдзэфэ пытэхэр зэрэIуащыхэрэм ыпкIэ игъом зэкIэми атын фай. Коронавирусым Iофыгъохэр къызщихьыгъэ уахътэм интернетыр бгъэфедэзэ ар птыныр анахь IэшIэх. «Сбербанк-онлайн» зыфиIорэ приложениемкIэ уиунэ уимыкIэу птын плъэкIыщт.
ГущыIэм пае, квитанциер пIыгъымэ ащ тет QR-кодыр бгъэфедэщт, лицевой счетыри ащ итхагъ, ащкIэ птыми хъущт. Ахэм анэмыкIэуи «Автоплатеж» зыфиIорэ фэIо-фашIэр щыI. Ащ ишIуагъэкIэ зыпарэми умыкIоу ыкIи «Сбербанк-онлайныри» къызэIупхын имыщыкIагъэу хэкIыр зэрэIуащырэм ыуасэу къыпфалъытагъэр уикартэ банкым ригъэкIыщт.
Региональнэ операторым зыфэжъугъэзэн фаеу хъугъэмэ, электроннэ шIыкIэм тетэу письмэ къэжъугъахьын шъулъэкIыщт. Мары адресыр: adg_ecocentr@clean-rf.ru. Джащ фэдэу «унэе кабинетыр» жъугъэфедэн амал щыI.
А зэпстэумэ анэмыкIэу телефонкIэ шъукъытеон шъулъэкIыщт. Мары номерхэр: 8.800-707-05-08, 8(8772) 21-06-00, 8.962-868-14-62.
ООО-у «ЭкоЦентрэм» и Адыгэ шъолъыр къутамэ ипресс-къулыкъу