Коронавирусым пэшIуекIогъэнымкIэ Оперативнэ штабым изэхэсыгъоу тыгъуасэ щыIагъэм зэпахырэ узым ылъэныкъокIэ Iофхэм язытет нахьышIу шIыгъэным амалэу щыIэр зэкIэ ехьылIэгъэн зэрэфаер Адыгэ Республикэм и ЛIышъхьэу КъумпIыл Мурат къыIуагъ.

Непэрэ мафэм ехъулIэу Iофхэм язытет къытегущыIагъ Роспотребнадзорым АдыгеимкIэ и ГъэIорышIапIэ ипащэу Сергей Завгороднер. Ащ къызэриIуа­гъэмкIэ, IэкIыбым къикIыжьыгъэхэм ыкIи сымаджэ хъугъэхэм яолIагъэхэм коронавирусыр къапыхьагъэмэ уплъэкIу­гъэным фэшI тестирование арагъэкIу. Тест-системэ мини 2,8-рэ фэдиз IэпэчIэгъанэу яI. Мы мафэхэм джыри мыщ фэдэ пкъыгъо мини 6 къа­IэкIэхьанэу щыт. Коронавирусыр яIэу республикэм нэбгыри 4 щагъэунэ­фыгъ, нэбгырэ 14-мэ ягуцафэх.

Министрэу Мэрэтыкъо Рустем къызэриIуагъэмкIэ, мыхэм инфекционнэ сымэджэщым щяIазэх. Сымэджэ хьылъэ­хэр ахэтхэп. Тхьабылхэм Iоф языгъэ­шIэщт аппарати 104-у щыIэм джыри 15 хагъэхъуагъ, ащ нэмыкIэу пкъы­гъо 24-рэ къаIэкIэхьанэу ежэх. Медицинэ маскэ мини 146-рэ къаIу­кIагъ. Ахэр анахьэу зищыкIэгъэ къулыкъухэм, медицинэм иIофышIэхэм атырагощэщтых.

— Тиврачхэм япсауныгъэ къэтыухъумэн фае. Эпидемием пэшIуекIогъэнымкIэ ахэр ары апэу щытхэр. Медицинэм иIофышIэхэм къатефэрэ ахъщэ тынхэр аIэкIэгъэхьэгъэнымкIэ унашъоу щыIэр АР-м псауны­гъэр къэухъумэгъэнымкIэ и Министерствэ зэрифэшъуашэу ыгъэцэкIэнэу фэсэгъэпытэ. ЦIыфыр къэзыухъумэрэ медицинэ пкъыгъохэр щэфыгъэнхэм фэшI республикэ бюджетым къыхэхыгъэ мылъкур дгъэфедагъэ. Iэзэгъу уцхэм ящэфынкIэ мылъку тедзэ афэттIуп­щыщт. Федеральнэ гупчэм къи­кIыгъэ сомэ миллион 54-р медицинэ оборудованием ищэфын пэIудгъэхьан фае, — къыгъэуцугъ пшъэ­рылъ Адыгеим и ЛIышъхьэ.

Непэрэ мафэм ехъулIэу гъэлъэ­шыгъэ шIыкIэм тет режимыр рес­публикэм егъэцакIэ. Коронавирусым зимыушъомбгъуным фытегъэ­псыхьэгъэ унашъохэр Адыгеим и ЛIышъхьэ къыдигъэкIыгъэх. Анахьэу ар зэпхыгъэр цIыфхэр яунэхэм къарымыкIынхэр ары.

— Iофхэм язытет нахьышIу шIыгъэнымкIэ мы лъэбэкъур ары анахь мэхьанэшхо зиIэр. ПэшIорыгъэшъ Iофтхьабзэу зэхатщэхэрэр цIыфхэм къа­фэтIотэн фае. Шъолъырым щыпсэурэ нэбгырэ пэпчъ ипсауныгъэ къэухъу­мэгъэным ар фытегъэ­псыхьагъ, — къыIуагъ рес­публикэм ипащэ.

Мы режимыр гъэцэкIагъэ зэ­рэхъу­гъэм муниципалитетхэм хэбзэухъумэкIо, уплъэкIун къулыкъухэр ягъусэхэу лъыплъэнхэ фаеу КъумпIыл Мурат пшъэ­рылъ къафишIыгъ. Пенсионерхэм IэпыIэгъу афэхъунхэм фэхьазырых волонтер-медик 600-м ехъу, нэ­мыкI социальнэ къулыкъухэр.

Джащ фэдэу общественнэ транспортым иIофшIэн, ермэлыкъхэм язэхэщэн къызэтегъэуцогъэнхэм яIофыгъохэми къэзэрэугъоигъэхэр атегущыIагъэх. Непэрэ мафэм ехъулIэу хьакIэщхэм ыкIи санаториехэм зекIуи 100 фэдиз арыс, ахэри къыздикIыгъэхэм кIожьыщтых.

Коронавирусым зимыушъомбгъунымкIэ IофшIэныр зэхэщэгъэн зэрэфаемкIэ муниципальнэ образованиехэм ыкIи къоджэ псэупIэхэм япащэхэм пшъэрылъ гъэнэфагъэ афагъэуцугъ.

Мы зэхэсыгъом ыуж коронавирусыр къызпыхьэгъэ сымаджэхэр аштэнхэм медицинэм иучреждениехэр зэрэфэхьазырхэр Адыгеим и ЛIышъхьэ ыуплъэ­-кIугъ. Министрэу Мэрэтыкъо Рустем игъусэу Мыекъопэ къэлэ сымэджэщым щыIагъ.

Iофхэм язытет нахь дэй зыхъукIэ сымаджэхэр аштэнхэ зэралъэкIыщтыр, ащ фытегъэпсыхьэгъэ палатэхэу, реанимационнэ отделениеу агъэхьазырыгъэ­хэр къафиIотагъ учреждением иврач шъхьаIэу Владимир Лобода.

— ЦIыфхэр яунэхэм арысынхэр ары джырэ уахътэ тэркIэ анахь шъхьаIэу щытыр. Арэу щытми, Iофхэм язытет зыфэдэщтым исценарий зэфэшъхьафхэм тафэхьазырын, Iэзэгъу уцхэр, оборудованиер IэпэчIэгъанэу тиIэнхэ фае. Медицинэм иIофышIэ нэбгырэ пэпчъ ухъумэгъэн фае, — къыхигъэщыгъ КъумпIыл Мурат.

Адыгеим и ЛIышъхьэ ипресс-къулыкъу.